Federica Mogherini mbledh sot në Bruksel kryeministrat e Ballkanit Perëndimor
Opozita në protestë, kryeministri Rama takon shefen e BE
Kryeministrat
e 6 vendeve të Ballkanit Perëndimor do të mblidhen sot në Bruksel, në një takim me përfaqësuesen për Punët e Jashtme në BE, Federica Mogherini. Takimi joformal vjen me ftesë të Mogherinit dhe pritet të diskutohet për ngjarjet në rajon dhe pritshmëritë për vitin 2018. Në darkë janë ftuar kryeministrat nga Shqipëria, Kosova, Mali i Zi, Maqedonia, Serbia dhe nga Bosnjë e Hercegovina. Para darkës së përbashkët të punës, Mogherini do të zhvillojë takime të shkurtra bilaterale me secilin nga kryeministrat e thirrur. Ky në fakt është takimi i dytë shumë i afërt që kryeministri shqiptar, Edi Rama bën me Përfaqësuesen e Lartë të Komisionit Europian për Politikën e Jashtme dhe Sigurinë, Federica Mogherini. Dy javë më parë ai ishte në Bruksel, ku pati një takim veçmas me Federica Mogherinin. "Nën lidershipin e tij, Shqipëria ka bërë një punë të jashtëzakonshme, veçanërisht në reformën e drejtësisë, luftën kundër drogës dhe korrupsionit, një punë që ne e mbështesim e që du- het të vazhdojë përpara dhe kjo është një punë që mund të hapë rrugën drejt hapave të mëtejshëm të procesit të integrimit në BE. Jam e lumtur që kam përsëri këtë mundësi për të diskutuar së bashku mënyrën se si këto hapa mund të shndërrohen në një opsion të vërtetë në fillim të vitit të ardhshëm", tha Mogherini pas këtij takimi. Ndërkohë, takimi i kryeministrave të Ballkanit është i dyti brenda këtij viti. I parë u mbajt në muajin maj, takim ku ra në sy veshja e kreut të qeverisë shqiptare, Rama.