Qeveria shqiptare do të ndërtojë varret e ushtarëve grekë
Marrëveshja e 2010- ës/ Këshilli i Ministrave caktoi 28 tetorin, ditë zyrtare në kujtim të të rënëve Sipas autoriteteve të Greqisë, në tokën shqiptare kanë rënë 12 mijë trupa
Qeveria shqiptare ka vendosur të ndërtojë varrezat e ushtarëve grekë të rënë në Shqipëri gjatë luftës italo- greke në vitet 1940- 1941. Vendimi për zbatimin e marrëveshjes së vitit 2010 për hapat e mëtejshëm është marrë në mbledhjen e qeverisë më 13 dhjetor dhe udhëzohen ministritë përkatëse për kryerjen e procedurave që nga shpronësimi i tokës e deri tek ndërtimi i varrezave. Kështu, Këshilli i Ministrave vendosi që Ministria e Mbrojtjes dhe Ministria e Infrastrukturës dhe Energjisë të ndjekin procesin e shpronësimit të trojeve për ndërtimin e vendprehjeve të ushtarakëve grekë, të rënë gjatë luftës greko- italiane të viteve 1940- 1941. Ministria e Mbrojtjes, në bashkërendim me Ministrinë e Brendshme do të ndërmarrin të gjitha procedurat ligjore për marrjen në administrim të trojeve për ndërtimin e vendprehjeve. Ndërkaq, Ministria e Brendshme në bashkëpunim me bashkitë, të cilat do të jenë pjesë e procesit të kërkimit, identifikimit, zhvarrimit dhe varrimit të eshtrave duhet të sigurojnë të gjitha lejet për procesin, të përgatitin të gjithë dokumentacionin shoqërues, si dhe të marrin të gjitha masat për të bërë të mundur fillimin dhe vazhdimin e procesit në zbatim të marrëveshjes. Ministritë dhe institucionet e tjera shtetërore të për- faqësuara me ekspertë në Komitetin e Përbashkët në terren do të përballojnë shpenzimet për realizimin e detyrave nga këta ekspertë, sipas legjislacionit në fuqi. Vendimi përcakton gjithashtu se Ministria e Mbrojtjes, në zbatim të pikës 8, të nenit 1 të marrëveshjes të organizojë në bashkëpunim me palën greke, ceremonitë zyrtare në përkujtim të të rënëve në luftë, çdo vit, në datën 28 tetor. 28 tetori është Dita Kombëtare e Greqisë dhe ndryshe nga vendet e tjera që festojnë ditët e përfundimit të dy luftërave botërore, Greqia ka vendosur si festë kombëtare futjen në Luftën e Dytë Botërore dmth., fillimin e luftës greko- italiane. Ky vendim vjen pak kohë pas takimit që ministri për Evropën dhe Punët e Jashtme, Ditmir Bushati pati me homologun e tij grek, Nikos Kotzias dhe shprehjes së vullnetit nga të dyja palët për zgjidhjen e çështjeve të mbetura të hapura mes dy vendeve. Sipas autoriteteve të Greqisë, në luftën italo- greke në vitet 1940- 1941 në tokën shqiptare kanë rënë 12 mijë trupa greke.
"Vendimi përcakton gjithashtu se Ministria e Mbrojtjes, në zbatim të pikës 8, të nenit 1 të marrëveshjes të organizojë në bashkëpunim me palën greke, ceremonitë zyrtare në përkujtim të të rënëve në luftë çdo vit, në datën 28 tetor".