Arta Marku zgjidhet kryeprokurore, betohet mes kaosit e tymit në Kuvend
Opozita kërkoi heqjen nga rendi i ditës, Ruçi: Drejtohuni në Kushtetuese PS, 28 firma në mbështetje, çfarë thotë ligji për prokurorinë
Arta Marku është Prokurorja e Përgjithshme që do të mbajë këtë post përkohësisht deri në zgjedhjen e kryeprokurorit me mandat të plotë 7vjeçar nga Këshilli i Lartë i Prokurorisë me t'u krijuar. Marku u zgjodh dje, në Kuvend, mes një kaosi total, me 69 vota "pro", 2 kundër dhe 2 abstenim. Opozita kërkoi në fillim të seancës heqjen nga rendi i ditës të pikës për votimin e kryeprokurorit të përkohshëm. "Në emër të Kushtetutës ju kërkoj të tërhiqeni. Kushtetuta është arsyeja pse ekziston ky parlament",- tha Basha. Por nga ana e tij, Kryetari i Kuvendit, Gramoz Ruçi hodhi në votim kërkesën e opozitës për heqjen nga rendi i ditës të kërkesës për zgjedhjen e kryeprokurorit të përkohshëm e pas votimit kundër të deputetëve të shumicës, procedurat vijuan. Në votim morën pjesë edhe dy deputetet e PDIU- së Reme Lala e Elena Xhina. Ruçi u shpreh se opozita mund t'i drejtohet Gjykatës Kushtetuese nëse mendon se futja në rendin e ditës e zgjedhjes së Prokurorit të Përgjithshëm të përkohshëm, nuk është e ligjshme. "Lidhur me atë që ka pabesi, mosbesim, amorale dhe të tjera, nuk keni të drejtë, pasi çështja e përfshirjes së rendit të ditës së zgjedhje së Prokurorit të Përgjithshëm të përkohshëm nuk është pabesi pasi edhe po të ishte seanca e të enjtes do të ishte e njëjta. Pasi ju keni kalendarin 3javor dhe është futur kohë më parë. Dhe në çdo kalendar futet neni që thotë se, dekretet, propozimet, zgjedhjet, futen automatikisht në rend të ditës",- tha Ruçi. "Për të përcaktuar kushtetutshmërinë apo antikushtetutshmërinë e vendimeve të Kuvendit është e drejta e grupeve parlamentare t'i drejtohen Gjykatës Kushtetuese për të shqyrtuar ven-
dimin e Kuvendit. Mekanizëm tjetër parlamentar nuk ka",- tha Ruçi. Momenti i votimit është shoqëruar me rrëmujë nga ana e deputetëve të PD- së dhe LSI- së. Janë vënë re lëvizje të deputetëve si nga PD ashtu edhe nga PS për të marrë kartonët e deputetëve. Ndërkohë prokurorja e votuar me shumicë votash ka qëndruar vetëm pak minuta në sallën e Kuvendit, sa për të bërë betimin dhe pasi tha fjalën "Betohem", ajo u largua me shpejtësi, e shoqëruar nga garda. Arta Marku u propozua nga grupi parlamentar i PS- së, mbështetur edhe nga firmat e 28 deputetëve. Deputetët e
PS- së në këtë propozim iu referuan nenit 109 të ligjit "Për organizimin dhe funksionimin e prokurorisë në Republikën e Shqipërisë", ku thuhet se "në rast se mandati i Prokurorit të Përgjithshëm përfundon përpara kohe, përpara krijimit të Këshillit të Lartë të Prokurorisë, funksionet e Prokurorit të Përgjithshëm, me vendim të Kuvendit, caktohet t'i kryejë një nga prokurorët me më shumë eksperiencë nga radhët e prokurorëve dhe që përmbush kushtet dhe kriteret e kreut V, seksioni I të këtij ligji". Kërkesa e PS- së i është dërguar tri ditë më parë, Kreut të Kuvendit. Ish- ministri Saimir Tahiri mungoi në seancën e djeshme parlamentare. Ai nuk ka ardhur në parlament që prej momentit, kur atij iu pezullua anëtarësia në grupin parlamentar të PSsë dhe nisën hetimet, i akuzuar për përfshirje në trafikun e drogës dhe lidhje me grupin e Habiljave.