Naftëtarët e Ballshit: Na jepni pagat, ose do i vëmë flakën uzinës
Prej 15 ditësh, punëtorët kanë ngelur të papunë pasi po bëhet remonti i repartit Kamber Iljazi: Protesta do të përshkallëzohet
Qindra punonjës të Kombinatit të Për punimit të Naftës në Ballsh kanë protestuar ditën e djeshme para uzinës, pasi ende nuk kanë marrë pagën e muajit nëntor. Ndërkaq, rreth 1000 punonjës kanë mbetur të papunë prej dy javësh pasi Inspektorati Shtetëror Teknik po kryen remontin në repartin e Koksit. Pas një incidenti të ndodhur për shkak të një defekti, 15 ditë më parë, një punonjës u plagos e për pasojë u pezullua puna në uzinë. Naftëtarët kanë kërkuar të revoltuar të drejtat e tyre dhe kanë bërë thirrje për ndihmë ndaj shtetit, ndërkohë tregojnë se ende nuk iu janë paguar sigurimet. Ata pretendojnë se qiramarrësit e uzinës u kanë thënë se s'kanë para që t'u japin rrogat punëtorëve si dhe t'u paguajnë sigurimet shoqërore. "Ne, rrogën e muajit nëntor nuk e kemi marrë, në një kohë që njerëzit presin të festojnë Vitin e Ri, ne i njëjti muhabet tërë kohën. Për vite me radhë, çdo vit të ri e festojmë me protesta",tha njëra prej punonjësve në një prononcim për mediat. Më tej, punëtorët e uzinës kanë kërkuar furnizimin me lëndë të parë për rifillimin e punës, pasi sipas tyre, ky është premtimi i kryeministrit Edi Rama i cili është shprehur se do të jetë ky kombinat që do të bëjë përpunimin e naftës shqiptare.
"Jo të dalë nafta e Shqipërisë e të përpunohet në Spanjë e vende të tjera, edhe të rrijë kombinati i naftës në vend pa punë. Kjo është diçka që nuk mund të tolerohet",- theksoi kreu i sindikatës së naftëtarëve, Kamber Iljazi. Ky i fundit theksoi se, nëse nuk merren masa nga instancat përkatëse për përmirësimin e situatës e plotësimin e kërkesave të naftëtarëve, atëherë protesta do të përshkallëzohet edhe më tej. Punëtorët e uzinës kërkojnë që pagat e tyre të përfshihen në listë pagesë për këtë muaj. Sakaq ata i bëjnë apel shtetit që të ndërhyjë për rregullimin në kohë të defektit, në mënyrë që të rikthehen në punë. "Duam pagat edhe punë, ndryshe kjo çështje do të kthehet si në Irak, do i vëmë flakën nga cepi në cep, ta djegim uzinën, e le ta dijë qeveria edhe kushdo tjetër,"- u shpreh i revoltuar një prej naftëtarëve. Punonjësit më tej kanë kërcënuar se, nëse nuk do t'u jepen paratë do të lënë jugun e vendit pa energji elektrike. "Ne jemi reparti i zjarrfikëses e nëse pronari lajmëron se nesër s'ka punë, për shumë arsye ekonomike a financiare si i ka ai, ne gjithsesi jemi të detyruar të rrimë në punë",tha një tjetër punonjës.
Por nuk është hera e parë që naftëtarët e Ballshit ngrihen në protestë për pagat e pa marra. Në vitin 2016, rreth 500 punëtorë të Kombinatit të Përpunimit të Thellë të Naftës në Ballsh protestuan në lidhje me këtë shqetësim ku tentuan të hyjnë në sallën e Komandës së TEC- it për të stakuar energjinë elektrike, por nuk u lejuan nga policia.