Incidentet në Kuvend, PD padit në prokurori Ruçin
Edi Paloka: Janë vrarë deputetë të opozitës
Partia
Demokratike pa diti dje në prokurori, kryetarin e Kuvendit, Gramoz Ruçi dhe punonjësit e Gardës për shpërdorim detyre. Kallëzimi vjen pas votimit të ditës së hënë në Kuvend, ku u zgjodh kryeprokurorja Arta Marku. Opozita pretendon se Ruçi ka urdhëruar Gardën e Republikës të ushtrojë dhunë ndaj deputetëve të PD. Më herët ishte PS, që i kërkoi Kuvendit përjashtimin e 7 deputetëve të opozitës për hedhjen e tymueseve në sallën e Kuvendit. Nënkryetari i PD, Edi Paloka i është përgjigjur kreut të Kuvendit, Gramoz Ruçi, i cili deklaroi se skenat e së hënës në parlament nuk kishin ndodhur asnjëherë në këto 27 vite. Paloka tha se më parë ka ndodhur që deputetët e opozitës janë vrarë dhe sulmuar fizikisht brenda ambienteve të parlamentit. "Gramoz Ruçi paska deklaruar se dhuna e ushtruar të hënën në parlament nuk ka precedentë në 27 vjet. Në këto 27 vjet ka ndodhur që deputetë të opozitës janë vrarë dhe sulmuar fizikisht brenda parlamentit. Por, si asnjëherë në këto 27 vjet, kriminelët, vrasës, trafikantë droge dhe prostitutash u ngritën në piedestal si anëtarë të parlamentit", tha Paloka. Sipas tij, Garda u përdor në seancë për të bllokuar foltoren e Kuvendit si asnjëherë më parë, duke i hequr të drejtën e fjalës opozitës. "Si asnjëherë në këto 27 vjet, Garda e Republikës u përdor për të bllokuar foltoren e parlamentit, duke i hequr dhunshëm opozitës të drejtën e fjalës. Të gjitha këto dhe më shumë se kaq kanë ndodhur sa herë vendi dhe parlamenti është drejtuar nga partia e Gramoz Ruçit", tha Paloka.