Dhuna në protestën e opozitës, gjykata liron 6 personat e ndaluar
Në seancë, të pranishëm deputetët e PD, Strazimiri, Murrizi, Balliu e Çela
Gjykata
Penale e Tiranës caktoi dje masën e sigurisë "detyrim paraqitje" për gjashtë personat e ndaluar ditën e hënë, për shkak të incidenteve të shënuara gjatë protestës së zhvilluar nga opozita para Parlamentit. Organi i akuzës ka kërkuar që për ta të caktohet masa e sigurisë e detyrimit për t'u paraqitur në prokurori një herë në javë. Gjykata ka pranuar kërkesën e prokurorisë, duke lënë të lirë 6 protestuesit, mbi të cilët rëndon akuza e kundërshtimit të punonjësve të policisë, në tentativë për të çarë kordonin e efektivëve dhe për t'u futur në Kuvend, ku po zhvillohej seanca për zgjedhjen e kryeprokurores së re. 6 personat, sipas prokurorisë janë fiksuar nga kamerat duke goditur efektivët e policisë. Konkretisht, janë lënë të lirë protestuesit Renato Xhihani, 19 vjeç, lindur dhe banues në Kavajë; Ervis Hajredini, 21 vjeç, lindur dhe banues në Lushnjë; Igli Hasani, 24 vjeç, lindur dhe banues në Lushnjë; Fanol Prifti, 40 vjeç, lindur dhe banues në Lushnjë; Sokol Vuçeta, 46 vjeç, lindur dhe banues në Shkodër ( i dënuar më parë); Shyqri Proshka, 33 vjeç, lindur dhe banues në Kavajë. Gjatë masës së sigurisë, të pranishëm në sallën e gjyqit ishin edhe de- putetët e PD, Gent Strazimiri, Myslym Murrizi, Klevis Balliu, Isuf Çela. Specialistët e Seksionit për Krimet ndaj Jetës dhe Pronës në Drejtorinë Vendore të Policisë Tiranë, nën drejtimin e Prokurorisë së Rrethit Gjyqësor Tiranë, në vijim të veprimeve hetimore evidentuan, dokumentuan dhe kapën shtetasit që kundërshtuan me dhunë punonjësit e policisë gjatë protestës së opozitës, të zhvilluar në datën 18 dhjetor 2017 para Kuvendit të Shqipërisë.