Organet e drejtësisë, Hysi: Gati në pranverë, opozita të bëhet pjesë
Nënkryetarja e Kuvendit sqaron ngritjen e strukturave të reja
Nënkryetarja
e Kuven dit, deputetja e ' Ligjeve', Vasilika Hysi sqaroi dje mënyrën se si do të ngrihet korpusi i organeve të reja të drejtësisë. Gjyqtarët që kandidojnë për Këshillin e Lartë Gjyqësor dhe prokurorët që kandidojnë për Këshillin e Lartë të Prokurorisë po kalojnë në filtrin e organeve të vetingut. Ndërsa, anëtarët që emëron Kuvendi për secilin institucion, që vijnë nga radhët e avokatëve, pedagogëve të drejtësisë dhe shoqërisë civile, verifikohen nga Operacioni Ndërkombëtar i Monitorimit. Kuvendi është gati të nisë punën për të zgjedhur anëtarët e vet, por po pret vlerësimin e të huajve edhe për tre kandidatët e shoqërisë civile për vendin vakant në Këshillin e Lartë të Prokurorisë. "Pa dyshim kriteret ishin të forta, sepse bëhet fjalë për zgjedhjen e qeverisë së gjyqësorit, por nuk e kisha menduar, që përfaqësues të shoqërisë civile të mos kishin besim dhe predispozitë", tha Vasilika Hysi në një prononcim për "TCH". "Çdo afat lidhet me momentin kur na vjen lista me të gjithë kandidatët nga sekretari i përgjithshëm dhe OMM ndërkohë ka bërë dhe vlerësimin", thotë ajo. Që nga ky moment puna nis brenda 24 orëve në Komisionin e Ligjeve, që do të kenë përpara dy lista me emrat që i plotësojnë dhe nuk i plotësojnë kriteret. Ata vlerësohen nga një nënkomision me tre anëtarë nga mazhoranca e dy nga opozita. Shorti është parashikuar si mekanizëm zhbllokimi. "Komisioni i voton kandidaturat me 4 vota. Në rast se nuk merren katër vota, atëherë hidhet shorti", vijon Hysi. Edhe nëse Kuvendi e kryen misionin e tij në afat, ngritja e KLGJ dhe KLP varet nga ritmi me të cilin organet e vetingut do të verifikojnë kandidatët gjyqtarë dhe prokurorë. "Nuk kemi informacion se në ç'fazë është trajtimi i dosjeve të kandidatëve dhe se çfarë problematikash do kenë kandidatët", tha Hysi. Ajo shprehet optimiste se në pranverë këto organe do të ngrihen, ndërsa uron që opozita të bëhet pjesë e procesit.