Këshilltari i Ilir Metës përkujton priftin shqiptar që u vra nga grekët
Nënshtetësia e Janullatos, Prokopis Pavlopulos telefonon Presidentin shqiptar At Stathi Melanit iu refuzua mesha në 100- vjetorin e vrasjes
Nënshtetësia shqiptare e kryepeshkopit Janullatos duket se nuk është parë nga të gjithë me sy të mirë. Edhe brenda Presidencës duket se ka kundërshti, por jo të shprehura. Këshilltari i Presidentit, Flamur Gashi, përmes një statusi në rrjetin social "Facebook" ka kujtuar dje, priftin ortodoks shqiptar, At Stathi Melani, me rastin e 100vjetorit të vrasjes së tij. Duket se përmes këtij statusi, Gashi ka dashur të kujtojë se merita në ortodoksinë shqiptare ka edhe At Melani, të cilit siç thuhet, kisha ortodokse në Përmet nuk i ka rezervuar asnjë meshë. Ndërkohë dje, Presidenti grek, Prokopis Pavlopulos falënderoi Presidentin shqiptar, Ilir Meta, për dhënien e nënshtetësisë shqiptare kryepeshkopit Anastas Janullatos. Përmes një bisede telefonike, bëri të ditur zëdhënësi i Presidentit, Tedi Blushi, homologu grek e ka falënderuar për vendimin e tij për t'i dhënë shtetësinë shqiptare Forlumturisë së Tij, Kryepeshkopit të Tiranës, Durrësit dhe të të gjithë Shqipërisë, Anastas Janullatos, si një akt të merituar për kontributin e tij disavjeçar në krye të Kishës Orthodhokse Autoqefale të Shqipërisë dhe si një hap të rëndësishëm që i shërben klimës së bashkëpunimit dhe përmirësimit të mëtejshëm thelbësor të marrëdhënieve të Greqisë me Shqipërinë. Presidenti Meta i shprehu kënaqësinë dhe vlerësoi edhe njëherë kontributin e Fortlumturisë së Tij në ringritjen e Kishës Orthodhokse Autoqefale të Shqipërisë dhe në forcimin e bashkëjetesës, harmonisë dhe tolerancës fetare në Shqipëri. Duke theksuar rëndësinë e marrëdhënieve në rritje mes dy vendeve tona, Presidenti Meta nënvizoi se ky vendim do t'i shërbejë jo vetëm forcimit të këtyre marrëdhënieve, por edhe klimës pozitive mes dy popujve tanë. Gjatë bisedës telefonike, dy presidentët shkëmbyen urime miqësore për festat e fundvitit.
STATUSI
Në statusin e tij, këshi- lltari i kreut të zhtetit, Flamur Gashi, i cili ka qenë edhe këshilltar i ish- presidentit Bujar Nishani shkroi: "Sta- thi Melani ishte një prift ortodoks shqiptar, pjesëmarrës i Kongresit të Manastirit, i cili vendimet e marra në kongres për përhapjen e alfabetit të gjuhës shqipe i zbatonte në fshatrat e Shqipërisë së jugut. Për veprimtarinë e tij patriotike, ai u përndoq nga autoritetet turke që sundonin në atë kohë në Shqipëri. Edhe përkundër faktit që turqit ia dogjën tri herë shtëpinë, ai nuk e ndali veprimtarin e tij. Në të njëjtën kohë veprimtaria e tij përcillej edhe nga priftërinjtë ortodoksë grekë të cilët organizuan edhe vrasjen e tij. Kështu, më 24 dhjetor 1917, banda e kusarëve të Josif Suropullos i zuri pritën e vrau dhe i masakroi kufomën duke i prerë kokën për t'u tërhequr vërejtjen dhe frikësuar veprimtarët e tjerë shqiptarë ortodoksë. Megjithatë, vrasja dhe masakrimi i tij te të rinjtë e Shqipërisë së jugut ishte vetëm një vërtetim për rëndësinë e gjuhës shqipe", sqaron Gashi.