Vidhte marketet, përfundon në pranga tiranasi me tre emra
SARANDË - Një 34- vjeçar nga Tirana është prangosur si autor i disa vjedhjeve të marketeve në Sarandë, ndërsa po punohet për identifikimin dhe kapjen e bashkautorit. Shërbimet e Policisë të Komisariatit Sarandë, gjatë orëve të para të mëngjesit të djeshëm kanë bërë të mundur kapjen e njërit prej autorëve të disa vjedhjeve të marketeve të këtij qyteti. Bëhet fjalë për Ardit Shehun, banues në Tiranë. Mësohet se gjatë natës, 34- vjeçari së bashku me një shtetas tjetër kanë thyer xhamat e dyerve të disa marketeve të ndryshme në lagjen nr. 3, me qëllim vjedhjen e tyre. Policia gjatë patrullimit ka konstatuar dy persona, të cilët sapo kanë parë blutë, janë larguar me shpejtësi, njëri në këmbë e tjetri me një automjet tip "Volksëagen". Menjëherë patrulla e policisë është vënë në ndjekje të tyre, ku në rrugën "Abedin Dine", në lagjen nr. 2 të qytetit bregdetar ka bërë të mundur bllokimin e automjetit si arrestimin e njërit prej tyre dhe konkretisht të Ardit Shehut. Ndërsa, personi tjetër që u largua në këmbë ka mundur të largohet duke përfituar edhe nga errësira. Nga veprimet e para hetimore rezulton se Ardit Shehu identifikohet edhe me dy emra të tjerë: Klejdi Nelku dhe Jeton Nelku. Gjithashtu, ai dyshohet të ketë kryer edhe disa vjedhje të tjera të marketeve në Sarandë, për të cilat policia po punon për dokumentimin ligjor të tyre. Ndërkaq, vijon puna për identifikimin dhe kapjen e bashkautorit tjetër, me të cilin 34- vjeçari kryente vjedhjet. Materialet hetimore do t'i referohen Prokurorisë Sarandë për veprime të mëtejshme.