Dhunuan një person, ndalohen dhe më pas lirohen dy djemtë e Azem Hajdarit

SHKODËR - Dy djemtë e liderit të dhjetorit dhe një nga themeluesit e Partisë Demokratike, Azem Hajdarit janë ndaluar nga policia në pikën kufitare të Muriqanit, pasi akuzohen se kanë ushtruar dhunë ndaj një personi. Mësohet se 32- vjeçari Kirjald Hajdari dhe vëllai i tij 19- vjeçar, Azem Hajdari janë ndaluar më 2 janar të këtij viti në Muriqan, sepse ishin shpallur në kërkim për veprën penale "Plagosja e lehtë me dashje". Ngjarja për të cilën akuzohen dy vëllezërit ka ndodhur më 27 dhjetor të vitit që shkoi te "Varrezat e Dëshmorëve" në kryeqytet. Sipas burimeve nga policia, vëllezërit Hajdari kanë rrahur shtetasin Mikel Eduart Margjeka. Ndërkohë, pas konsultimit me prokurorinë dhe kryerjes së veprimeve procedurale, djemtë e Azem Hajdarit janë lënë në gjendje të lirë. Ndërkaq, mësohet se ka qenë një konflikt i çastit mes dy vëllezërve Hajdari dhe Margjekës, që ka çuar në dhunimin e këtij të fundit. Në kallëzimin që ka bërë në Policinë e Tiranës, Mikel Margjeka ka thënë se është goditur disa herë nga dy vëllezërit Hajdari, pranë varrezave "Dëshmorët e Kombit". Policia i ka shpallur në kërkim të rinjtë, pasi nuk i ka gjetur në banesën e tyre. Prandaj ata u ndaluan në pikën kufitare të Muriqanit dhe më pas u liruan me urdhër të prokurorisë. Kirjald dhe Azem Hajdari ishin nën shoqërinë e nënës së tyre, Fatmira Hajdari në momentin që u ndaluan nga policia kufitare e Muriqanit. Pasi u morën në pyetje, dy vëllezërit kanë pranuar konfliktin, por kanë thënë se nuk e kanë dhunuar Mikel Margjekën.