Macron reagon ndaj Trump: SHBA do të na çojë në luftë
Protestat popullore në Iran, nisin ndasitë mes aleatëve perëndimorë Presidenti francez: Pro protestuesve iranianë
Pas protestave të përg jakshme të Iranit janë shfaqur sërish ndasitë e thella mes aleatëve perëndimorë për mënyrën e trajtimit të konflikteve globale. Kësaj radhe ka qenë presidenti francez, Emanuel Macron, i cili ka etiketuar si "luftënxitëse" deklaratat në "Twitter" të presidentit amerikan për protestat në Iran. "Linja zyrtare e ndjekur nga Shtetet e Bashkuara, Izraeli dhe Arabia Saudite do të na çojë në luftë" - tha Macron, duke folur përpara gazetarëve në të parën konferencë për vitin 2018 në Paris. Shefi i Elizesë tha se është e rëndësishme që të ruhet linja e dialogut me Teheranin, që u vendos përmes marrëveshjes bërthamore me fuqitë e mëdha në vitin 2015. Macron ka shprehur mbështetjen për protestuesit iranianë që kërkojnë liri. Ndërsa tha se i qëndronte angazhimit për të vizituar Teheranin këtë vit, me kusht që situata t'i rikthehet sa më shpejt normalitetit. Revoltat popullore duket se janë shuar, teksa njësia speciale e ushtrisë iraniane e njohur ndryshe si "Garda Revolucionare" shpalli fundin e komplotit të huaj. Komandanti Mohamed Ali Xhafari fajësoi agjentët e huaj si organizatorë të protestave që i morën jetën 21 personave. Ndërsa premtoi dënime të ashpra për protestuesit që nxitën dhunën në protestat 7 ditore. Ndërkohë që dy ditë më parë Komuniteti Ndërkombëtar ka reaguar ashpër ndaj shtypjes me dhunë që Teherani po u bën protestave anti- qeveritare, duke shkaktuar vdekjen e 20 protestuesve brenda 7 ditëve. Ndërsa, përfaqësuesja e lartë për politikën e jashtme të unionit, Federika Mogerini tha se humbja e jetëve njerëzore është e papranueshme. Brukseli i bën thirrje Teheranit të garantojë lirinë e shprehjes. Protestat në Iran janë përhapur tashmë në të gjithë vendin, përfshirë edhe kryeqytetin Teheran. Analistët thonë se protestat nuk shtrihen tanimë vetëm në rrafshin ekonomik, kundër inflacionit dhe papunësisë së lartë dhe korrupsionit. Manifestuesit kërkojnë rrëzimin e regjimit të Ajatollahëve, që sipas tyre le popullin të vuajë teksa shpenzon energji dhe para për t'u marrë me konflikte jashtë vendit, siç është rasti i Palestinës. President i SHBA- ve, Donald Trump ka thënë se bashkë me të drejtat e njeriut, në Iran është duke u plaçkitur edhe pasuria e vendit. "Është koha për ndryshim", - ka thënë ai në rrjetin social "Twitter", ku ka deklaruar se Irani ka qenë i pasuksesshëm në të gjitha nivelet.