Tatimet: Ja si të paguani me këste një detyrim tatimor të papaguar
Afatet për pagesën e detyrimeve tatimore
Të
gjithë tatimpaguesit, të cilët deri në datën 31.12.2017 rezultojnë me detyrime tatimore të papaguara, që përbëjnë shkak për marrjen e masave shtrënguese nga administrata tatimore dhe të cilët nga ushtrimi i aktivitetit të biznesit ndeshen përkohësisht me një situatë të keqe financiare rikujtojmë se ligji u jep të drejtën për të paguar me këste një detyrim tatimor të papaguar. Për këtë, ata duhet t'i drejtohen me shkrim drejtorit të Drejtorisë Rajonale Tatimore nën juridiksion e së cilës ata janë të regjistruar dhe në këtë kërkesë duhet të shpjegohen të gjitha rrethanat dhe arsyet se përse kërkoni të lidhni një marrëveshje për të paguar me këste detyrimet tatimore. Drejtori i Drejtorisë Rajonale Tatimore, brenda 10 ditëve nga marrja e kërkesës, duhet të kthejë përgjigje nëse kërkesa pranohet apo refuzohet. Nëse kërkesa juaj është e paargumentuar dhe e pajustifikuar nga rrethanat, ajo mund të refuzohet ose ju mund t'ju kërkohet garanci bankare përpara se të hyni në një marrëveshje të tillë. Në rast se kërkesa aprovohet, hartohet një marrëveshje me shkrim, e cila nënshkruhet nga drejtori i Drejtorisë Rajonale Tatimore dhe nga ana juaj. Nënshkrimi i marrëveshjes për pagesën me këste të detyrimeve tatimore të papaguara e detyron administratën tatimore që gjatë periudhës për të cilën është rënë dakord për pagesën me këste të detyrimeve tatimore të papaguara, të mos ndjekë ndaj jush masat e mbledhjes me forcë të detyrimeve tatimore, por për përmbushjen e saj, ju keni detyrim ligjor të paguani detyrimet sipas marrëveshjes dhe detyrimet e periudhave vijuese. Nënshkrimi i një marrëveshjeje për pagesën me këste të një detyrimi tatimor nuk ndërpret llogaritjen e kamatëvonesave për mospagesë në afat të detyrimit tatimor. Marrëveshja e pagesës me këste mund të zgjidhet nga administrata tatimore në momentin më të parë që kon- statohet se ju nuk e respektoni atë, lidhur me korrektësinë e pagesave si dhe kur nuk paguani detyrimet tatimore që lindin gjatë periudhës së mbuluar nga marrëveshja.