Masat që duhet të merren brenda 15 janarit për shitjen e siguracioneve
Urdhri i AMF- së për kompanitë e sigurimit
Dy
inspektime të zhvilluara në muajin nëntor nga ana e Autoritetit të Mbikëqyrjes Financiare, në pikat e shitjes së policave për sigurimin e detyrueshëm motorik dolën në përfundimin se ka shkelje në ushtrimin e veprimtarisë së agjentit apo punonjësit të disa shoqërive të sigurimit. Duke marrë parasysh këtë problematikë, por edhe të tjera, AMF u ka vendosur një afat final kompanive të sigurimit që brenda 15 janarit të marrin masat e nevojshme për të eliminuar këto shkelje. Së pari, kompanive u është kërkuar që kontratat e sigurimit të detyrueshëm MTPL, të shiten vetëm nëpërmjet regjistrit elektronik online të shitjeve, në zbatim nenit 38, të ligjit "Për sigurimin e detyrueshëm në sektorin e transportit". Nga ana tjetër, nënshkrimi i kontratave të sigurimit të detyrueshëm të mbajtësve të mjeteve motorike për përgjegjësitë ndaj palëve të treta të bëhet vetëm nga ndërmjetësit në sigurime ose nga punonjës të shoqërive të sigurimit. Të gjitha shoqërive të sigurimit u është kërkuar të depozitojnë në Autoritet listën e punonjësve të autorizuar për nënshkrimin e kontratave të sigurimit, si dhe dokumentin që vërteton se është punonjës pranë kësaj shoqërie sigurimi. Autoriteti i Mbikëqyrjes Financiare ka kërkuar që çdo agjent ose punonjës në ambientet që ushtron veprimtarinë të ketë të afishuar në vende të dukshme tarifat e primit të sigurimit të detyrueshëm konform legjislacionit në fuqi, kopje të kushteve të kontratave të sigurimit të detyrueshëm, licencën e agjentit ose autorizimin e punonjësit për të nënshkruar kontrata sigurimi.