"Furtunë" në organin e akuzës, Arta Marku zëvendëson drejtuesit e 4 prokurorive në vend
Bashkëshortët akuzojnë Markun, Gina: Urdhri i paligjshëm. Gashi: Padi në Gjykatën Administrative Largohen nga detyra Gina, Deçolli, Ismailukaj e Gjana
Pas ndryshimeve të bëra në Prokurorinë e Përgjithshme dhe atë të Tiranës, vijojnë lëvizjet edhe në radhët e prokurorive në rrethe. Kryeprokurorja e përkohshme, Arta Marku, ditën e djeshme firmosi largimin e katër prokurorëve në vend. Konkretisht Marku largoi nga drejtimi i prokurorisë së Durrësit, Agron Gjanën, që e komandoi përkohësisht në prokurorinë e Pukës. Ai u zëvendësua nga Donika Prela, një nga ish- vartëset e tij. Iu ndërpre komandimi dhe u kthye si prokuror në prokurorinë ku është i emëruar, Dritan Ginës, drejtues i komanduar i prokurorisë së Elbasanit. Drejtues i përkohshëm i prokurorisë së Elbasanit u caktua Ardjan Nezha. Iu ndërpre komandimi Pali Deçollit, drejtues i komanduar i prokurorisë së Fierit. Në vend të tij u caktua Fatmir Lushi. Iu ndërpre komandimi prokurorit të rrethit gjyqësor Kukës, Artur Ismailukaj dhe në vend të tij u caktua Alketa Nushi. Sakaq Prokurorja e Përgjithshme e përkohshme Arta Marku do të përballet me padinë e parë për ndryshimet. Prokurorja Rovena Gashi, e liruar pak ditë më parë nga pozicioni i Drejtorit të Marrëdhënieve me Jashtë dhe shefes së Dekriminalizimit ka paditur në Gjykatën Administrative Arta Markun. Gashi kërkon nga Gjykata pezullimin e urdhrit për lirimin e saj, si edhe konstatimin e pavlefshmërisë absolute të urdhrit Prokurorit të Përgjithshëm të Përkohshëm.
PADIA
Prokuroria Rovena Gashi, e cilëson urdhrin e largimit ndaj saj si të pabazuar ligjërisht, abuziv dhe të paarsyetuar. Ajo iu drejtua gjykatës administrative, duke kërkuar shfuqizimin e vendimit për largimin nga detyra e drejtoreshës së Marrëdhënieve Juridiksionale me Jashtë. Në padi ajo veçon debatin mes saj dhe Markut në prani edhe të dy prokurorëve të tjerë në lidhje me kërkesën që dërgoi në KQZ për ndërprerjen e mandatit të deputetëve Aqif Rakipi e Gledion Rehovica. Në padi ajo pretendon se kryeprokurorja i ka kërkuar llogari përse kërkesën në fjalë e kishte dërguar pa u konsultuar paraprakisht me të dhe pa firmën e saj. "Kjo përbën shkelje ligjore dhe etike. Për këtë qëllim, lirohesh nga detyra e drejtorit të kësaj drejtorie", - mësohet t'i ketë thënë Marku - Gashit, sikurse thekson ajo në padi. Me poshtë janë renditur shkeljet mbi bazën e të cilave prokurorja Rovena Gashi e konsideron të paligjshëm vendimin për shkarkimin e saj. Së pari, urdhri i Prokurores së Përgjithshme të përkohshme nuk bazohet në asnjë dispozitë ligjore. Arta Marku, në pozicionin e saj, ushtron funksionet në bazë të dispozitave kalimtare, të parashikuara në nenin 160 të ligjit "Për statusin e gjyqtarëve dhe prokurorëve". Në asnjë prej dispozitave kalimtare, nuk parashikohet mundësia e Prokurorit të Përgjithshëm të përkohshëm për përcaktimin, miratimin apo ndryshimin e strukturës së institucionit. Së dyti, edhe nëse do të kishte kompetencë për ndryshimin e strukturës së Prokurorisë së Përgjithshme, kryeprokurorja e përkohshme nuk ka miratuar asnjë urdhër për ndryshime në organikë. Pra, Rovena Gashi është shkarkuar me argumentimin e ndryshimit të strukturës, ndërkohë që, të paktën deri në dorëzimin e padisë, kryeprokurorja e përkohshme nuk ka firmosur asnjë urdhër për ndryshimin e strukturës. Së treti, ligjvënësi ka parashikuar një mbrojtje të posaçme për prokurorët në detyrë gjatë kohës së ushtrimit të funksioneve të Prokurorit të Përgjithshëm të Përkohshëm. Ligji 97/ 2016 "Për organizimin Prokurorja e Përgjithshme e përkohshme Arta Marku do të përballet me padinë e parë për ndryshimet. Prokurorja Rovena Gashi, e liruar pak ditë më parë nga pozicioni i Drejtorit të Marrëdhënieve me Jashtë dhe shefes së Dekriminalizimit ka paditur në Gjykatën Administrative Arta Markun. dhe funksionimin e Prokurorisë", për të shmangur veprime abuzuese nga kryeprokurori i përkohshëm, në nenin 110 të tij i ka dhënë mbrojtjen maksimale që garantohet nga ligji nr. 96/ 2016 "Për Statusin e Gjyqtarëve dhe të Prokurorëve në Republikën e Shqipërisë", pikërisht për të garantuar parimin kushtetues të pavarësisë së prokurorit gjatë ushtrimit të detyrës së tij. Në këtë kuadër, vlerëson paditësja Gashi, përtej kapërcimit abuziv të kompetencave prej Prokurores së Përgjithshme të përkohshme, kjo e fundit nuk ka të drejtë të bëjë shkarkime të prokurorëve nga detyrat që ata mbajnë në kohën e hyrjes në fuqi të këtyre ligjeve. Së katërti, urdhri i Prokurores së Përgjithshme të përkohshme për shkarkimin e prokurores Gashi nga detyra e drejtorit është i paarsyetuar. Mungesa e arsyetimit të këtij akti individual lirimi, i cili sjell pasoja të drejtpërdrejta për paditësen, e bën këtë akt administrativ absolutisht të pavlefshëm, kjo referuar dispozitave të Kodit të Procedurave Administrative.
LIRIMI NGA DETYRA
Me firmën e Arta Markut, Dritan Ginës, iu ndërpre komandimi në krye të prokurorisë së Elbasanit. Ky i fundit, publikisht deklaroi se nuk do ta zbatojë urdhrin, duke e cilësuar arbitrar dhe të motivuar politikisht. "Nuk do ta lë detyrën, pasi është në bazë të një vendimi të paligjshëm", tha Gina. Ai paralajmëroi se
me t'u njohur me urdhrin e Arta Markut do të bëj një kallëzim penal për paligjshmërinë e tij. "E ushtroj këtë detyrë që nga 03.07.2017 në bazë të ligjit dhe do largohem nga kjo detyrë vetëm kur ta vendosë Këshilli i Lartë i Prokurorisë. Refuzoj të zbatoj një urdhër të paligjshëm. Nuk do ta braktis detyrën dhe do vijoj të ushtroj funksionin sikurse parashikon ligji. Sapo urdhri i prokurores së përkohshme të mbërrijë në zyrë do bëj një kallëzim penal për paligjshmërinë e tij",- është shprehur Gina. Ndërsa Gina ka vendosur të mos lëshojë zyrën, duke e cilësuar antiligjor dhe sulm politik vendimin e Arta Markut, në prokurorinë e Elbasanit dje mbërriti edhe Ardjan Nezha, prokurori i caktuar nga Arta Marku në këtë detyrë. Pasi ka mbërritur në prokurorinë e Elbasanit, Ardjan Nezha është prezantuar me stafin nga Kostaq Beluri, drejtori i Hetimit në Prokurorinë e Përgjithshme. Mësohet se Dritan Gina ndodhej në Prokurorinë e Elbasanit gjatë kohës që në këtë institucion prezantohej zëvendësi i tij, por nuk ishte i pranishëm në mbledhje. Gjatë takimit është lexuar urdhër shkarkimi i Ginës dhe urdhër emërimi i Nezhës. Sakaq shkarkimi i Ginës i bërë dje me urdhër të kryeprokurores Arta Marku, erdhi pak minuta pasi bashkëshortja Rovena Gashi, krahu i djathtë i Adriatik Llallës depozitoi një padi në Gjykatën Administrative për të shpallur të pavlefshëm urdhrin e Arta Markut për ta shkarkuar nga detyra.