Familjarët e viktimave të tragjedisë së 9 janarit: Me vetingun të zbardhet ngjarja
"Në rrjetin e trafikut, nga Shkodra në Vlorë ishin të përfshirë 30 oficerë policie" "Të afërmit tanë u trajtuan si kriminelë dhe kriminelët e vërtetë nuk u dënuan gjatë 14 viteve"
Katërmbëdhjetë vite pas tragjedisë së 9 ja narit 2004, ku humbën jetën 28 persona në bregdetin e Vlorës duke tentuar të largoheshin me gomone drejt Italisë, familjarët e tyre vazhdojnë të kërkojnë drejtësi. Kreu i Shoqatës 9 Janari, Nikollë Mhilli tha se shpreson që me vetingun të zbardhet dhe kjo ngjarje e rëndë. Ndërkaq, familjarët e viktimave deklaruan se në rrjetin e trafikut nga Shkodra deri në Vlorë ishin të përfshirë 30 oficerë policie. "Ne familjarët e viktimave të 9 janarit 2004, shpresojmë dhe besojmë se organet e drejtësisë më në fund do të bëjnë detyrën e tyre. Viktimat dhe të mbijetuarit e tragjedisë së vitit 2004 nuk ishin dhe nuk mund të jenë kriminelë për shkak se tentuan të shkojnë drejt Italisë për një jetë më të mirë. Kriminelë ishin ata funksionarë, pjesëtarë të strukturave qendrore dhe lokale, të policisë së shtetit që simuluan, organizuan dhe realizuan trafikimin e qenieve njerëzore dhe drogës drejt Italisë. Ishin pikërisht këta kriminelë që për t'i shpëtuar ndëshkimit nga drejtësia u përpoqën me çdo mënyrë dhe mjet të fshihnin ngjarjen e 9 janarit dhe pasojat tragjike të saj. Ishin këta kriminelë që zhdukën kufomat e viktimave që u gjetën rreth orës 6: 30 të 10 janarit të 2004- ës te gjiri i Dafinës. Ishin këta kriminelë që edhe pse kishin informacion shumë të qartë dhe të saktë mbi rrezikun për jetën e 40 shqiptarëve deklaronin se nuk kishte klandestinë në det, por se kishin të bënin me vetëm 2 trafikantë të identifikuar. Ishin këta kriminelë që sabotuan edhe çdo tentativë për kryerjen e një operacioni të kërkim- shpëtimi, në mungesë të të cilit humbën jetën tragjikisht me 9 janar 2004 familjarët tanë",- thuhet në deklaratën për mediat nga familjarët e viktimave të tragjedisë.
AKUZAT
Gjithashtu, ata shprehen se për 14 vite me radhë, drejtësia shqiptare, viktimat e kësaj ngjarje i trajtoi si kriminelë dhe kriminelët e vërtetë nuk i dënoi. "Kriminelët ishin shefi i zyrës së Luftës Kundër Trafiqeve në drejtorinë e policisë të qarkut Shkodër, Bardhyl Rroka bashkë me 34 oficerë të kësaj zyre, të cilët i nisën djemtë tanë dhe vajzat tona së bashku me drogën dhe ia dorëzuan oficerëve të policisë të qarkut Vlorë, Ilir Rrokaj, vëllait të tij, shefit të qarkullimit rrugor në Vlorë dhe oficerëve të tjerë që ishin të lidhur me trafikimin e qenieve njerëzore dhe drogës. Ky rrjet ishte i mirëorganizuar ku përfshihen rreth 30 oficerë policie nga Shkodra deri në Vlorë. Pavarësisht se janë shkarkuar nga detyra në atë
kohë me motivacionin: ' Kriminelë dhe bashkëpunëtorë në trafikimin e qenieve njerëzore', sot një pjesë e tyre janë në detyra kyçe. Kriminelë u bënë edhe ata që me ligj kishin për detyrë të bënin operacionin e kërkimshpëtimit, i cili nuk u bë kurrë si: Bajram Ibraj, drejtor i Policisë së Shtetit në atë kohë; Pëllumb Qazimi, shefi i Shtabit të Përgjithshëm; Kydret Çela, komandant i flotës detare. Besoj që organet e vetingut nuk do lejojnë më të bëhen masakrat njerë-
zore siç u bënë me 9 janar. Shpresojmë që kjo lloj drejtësie të varroset njëherë e mirë dhe ngjarja tragjike e 9 janarit të zbardhet",- thuhet në deklaratën e familjarëve të viktimave dhe shoqatës "9 Janari 2004". Familjarët akuzojnë prokurorinë, gjykatat dhe politikën shqiptare që nuk kanë zbardhur ende tragjedinë e 9 janarit. "Ne fajin na e ka prokuroria sepse e shkelur nga politika shqiptare prokuroria nuk e ka kaluar çështjen penale asnjëherë në gjykatë. Çështjen civile na e kanë mbajtur 12 vite me radhë. Dy vite na e ka mbajtur gjykata e Tiranës, 5 vjet Shkalla e Parë në Shkodër, dy vjet Gjykata e Apelit në Shkodër, 2 vjet Gjykata Administrative në Tiranë dhe tani dy vitet e fundit e kemi tek Gjykata e Lartë në Tiranë. Pikërisht që ne të mërzitemi ata na e kalojnë herë në Gjykatë të Lartë, herë tek e Apelit, tek Shkalla e Parë dhe kështu me radhë na sorollasin".