Vetingu në polici, përjashtohen efektivët që japin deklarim të rremë
Punonjësit që s'pranojnë t'i nënshtrohen procesit, të japin dorëheqjen Largohen automatikisht ata që fshehin pasurinë
Punonjësit e policisë që gjatë procesit të vlerë simit të njohur si vetingu do të japin deklarime apo informacione të rreme, do të përjashtohen nga radhët e uniformave blu. Kështu parashikohet në nenin 60- të të projektligjit të vetingut për policinë, i përgatitur nga Ministria e Brendshme. Sipas TV "Klan", përjashtime nga policia parashikohen edhe në raste të tjera ku përfshihet fshehja e pasurisë, mungesa e justifikimit ligjor të pasurisë që do të sjellë automatikisht largimin e çdo punonjësi nga uniformat blu. Zbulimi i lidhjeve apo kontakteve të konsideruara të papërshtatshme me persona të përfshirë në krimin e organizuar, do ta bëjë të pa- mundur vijimin e detyrës për një punonjës policie. Ata janë të detyruar t'i nënshtrohen testimit për varësinë ndaj drogës, alkoolit dhe lojërave të fatit.
Testime pritet të ketë edhe në karakterin psikologjik nëpërmjet makinës së të vërtetës. Refuzimi i kryerjes së testeve shtesë mund të jetë shkak për largimin nga detyra të punonjësit të policisë.
Por njëlloj si në rastin e gjyqtarëve dhe prokurorëve, edhe punonjësit e policisë që nuk dëshirojnë t'i nënshtrohen vetingut janë të lirë të japin dorëheqjen. Sipas draftit të hartuar, ata duhet të largohen jo më vonë se 30 ditë pas hyrjes në fuqi të ligjit. Në këtë rast të gjithë të dorëhequrit do të kenë mundësinë të trajtohen me pagë kalimtare. Por të gjithë ata punonjës policie që do të kalojnë fazën e parë të vetingut, nuk do ta mbyllin me kaq. Kjo, pasi në dispozitat kalimtare parashikohen kontrolle dhe vlerësime të tilla të ngjashme, që mund të bëhen në mënyrë periodike. Gjithsesi, projektligji mbetet ende në fazën e diskutimeve dhe tashmë po shqyrtohet nga institucionet e ndryshme.