Bushati: Cilësia dhe shpejtësia e reformave do të na afrojnë me BE
- 1 6 Zhvillohet takimi rajonal për bashkëpunimin territorial
Ministria
për Evropën dhe Punët e Jashtme organizoi dje, takimin rajonal mbi Programet e Bashkëpunimit Territorial, në të cilat aderon Shqipëria, me fokus mirëkoordinimin e instrumenteve financues të Bashkimit Evropian. Në fjalën e tij në këtë takim, ministri për Evropën dhe Punët e Jashtme Ditmir Bushati tha se viti në të cilin kemi hyrë, është vit vendimtar jo vetëm për progresin e Shqipërisë drejt anëtarësimit në Bashkimin Evropian, por për të gjitha vendet e rajonit të Ballkanit. "Prezantimi i Strategjisë së Zgjerimit muajin e ardhshëm, vendos në fokus politik dhe në një perspektivë konkrete politikën e zgjerimit. Ne presim nga kjo strategji propozime konkrete për hapat e radhës në ecurinë e procesit të aderimit për vendet e rajonit, përfshirë Shqipërinë, në një perspektivë afatshkurtër e afatgjatë",- tha ministri duke shprehur bindjen se veçanërisht, vijimi i implementimit të reformës në drejtësi, do të bëjë të mundur që dhe Shqipëria t'i bashkohet dy vendeve fqinje që tashmë kanë hapur negociatat për anëtarësim me Bashkimin Evropian, Mali i Zi dhe Serbia. Në fjalën e saj, ambasadorja e Bashkimit Evropian në Tiranë, Romana Vlahutin vlerësoi si të rëndësishme programet ndërkufitare dhe transnacionale, pasi sipas saj, ato jo vetëm rrisin cilësinë e jetës në vendet e rajonit, por ndërtojnë besimin mes njerëzve, mundësojnë shkëmbimin e njohurive, vlerave kulturore dhe traditave mes tyre. Kryetari i Bashkisë së Tiranës, Erion Veliaj i pranishëm në takim, tha se programet ndërkufitare dhe asistenca financiare e BE- së në përgjithësi, janë instrument kryesor i përmbushjes së vokacionit tonë drejt BE- së.