ERZEN SHKOLOLLI Një drejtor për dy shtete, nga Galeria e Kosovës në krye të Galerisë së Shqipërisë
Kush është kosovari në krye të institucionit kryesor të artit pamor në vend
Erzen Shkololli është drejtori i ri i Galerisë Kombëtare të Arteve të Shqipërisë. Pas katër vitesh në këtë detyrë, Artan Shabani do i dorëzojë detyrën Shkolollit, më herët ish- drejtor i Galerisë Kombëtare të Arteve në Kosovë. Prej muajsh emri i tij ka qenë më i përfoluri për postin në fjalë dhe për dy arsye: e para, sepse Shkololli është shumë i përfshirë në skenën e artit bashkëkohor ndërkombëtar, jo vetëm si ish- drejtor i GKK- së në Prishtinë, por edhe si kurator në disa ekspozita ndërkombëtare të dorës së parë, si "documenta". E dyta, sepse marrëdhëniet e tij me qeverinë shqiptare janë të kahershme. Zanafilla e këtyre marrëdhënieve shënohet prej kohës kur ai ishte në krye të GKK- së së Kosovës. Madje, si i tillë, ai ka ardhur me ekspozitë edhe në GKA- në e Shqipërisë, kur nga Kosova sillej ekspozita e Simon Shirokës.
Ka qenë një vendim qeverie i ditës së mërkurë, që e ka emëruar Erzen Shkolollin, i cili nga ana tjetër nuk është i panjohur në selinë e Këshillit të Ministrave. Ai ka hapur sezonin e tretë të vitit 2016 në COD- Qendra për Hapje e Dialog në Kryeministri. Sezoni titullohej "Të dialogosh me prani", ndërsa ekspozita i shtonte këtij titulli një konstatim "Duke qëndruar pezull"… Në rolin e kuratorit, ai pat ftuar në COD, artistët Flaka Haliti nga Kosova, Laurent Mareschal ( Francë), Nathan Coley ( Mbretëri E Bashkuar), Peter Kogler ( Austri) dhe Vigan Nimani ( Kosovë).
POR, KUSH ËSHTË ERZEN SHKOLOLLI?
Erzen Shkololli është artist dhe kurator, drejtor i Fondacionit "Unë e du Kosovën" në Prishtinë, Kosovë. Gjithashtu, ka qenë këshilltar kuratorial për ' documenta 14'. Ka qenë drejtor i Galerisë Kombëtare të Kosovës nga viti 2011 deri më 2015. Në vitin 2013, Shkololli ishte komisioner i prezantimit të parë të Republikës së Kosovës në edicionin e 55- të të Bienales së Venecias. Nga viti 2003 deri më 2007 mbajti pozitën e drejtorit artistik në Institutin e Artit Bashkëkohor EXIT në Pejë, një iniciativë e shkëmbimit në Kosovë, e cila e transformoi skenën kulturore vendëse. Praktika e tij artistike përdor ritualet dhe folklorin vendës për të tërhequr vëmendjen te situata specifike socio- politike dhe është ekspozuar ndërkombëtarisht në muze, siç janë Van Abbemuseum, Eindhoven; Centre Pompidou, Paris dhe Fridericianum, Kassel.
Shkololli organizoi Ekspozitën e Kontakt Art, të titulluar "Thirty One" ( Tridhjetë e një) dhe kuruar nga Hans Ulrich Obrist e Petrit Halilaj në Galerinë Kombëtare të Kosovës ( 2015). Ishte kurator i "Thirty Years After: Šejla Kameri?"( 2015), "Sokol Beqiri: Retro- spektivë" ( 2014), "Simon Shiroka: Retrospektivë" në Galerinë Kombëtare në Tiranë ( 2014) dhe në Galerinë Kombëtare të Kosovës ( 2013); bashkëkurator i ekspozitës "Engjëll Berisha - Befre: Retrospektivë" ( 2013) dhe "Grafika" nga koleksioni i GKK- së ( 2013).
Nga viti 2008 deri më 2009 ish- te përfitues i Bursës së DAAD- së për Artistët në Rezidencë. Nga viti 2003 është anëtar i Parlamentit Europian të Kulturës.
Artan Shabani erdhi në krye të GKA- së në vitin 2013, nga Italia ku jetonte. Pas katër vitesh ai i lë detyrën, ish- homologut të tij në Kosovë. Ndryshe prej epokës së Shabanit, ku qeveria la Galerinë Kombëtare pa asnjë mbështetje duke qenë se fokusi i saj ishte te Muzeu Marubi, Teatri "Migjeni", Muzeu i Ikonave në Korçë, Teatri i Korçës, Shtëpia me gjethe, etj., në këtë 4- vjeçar, GKA si edhe Muzeu Historik e Biblioteka Kombëtare do jenë në fokus të investimeve.