Ekzekutimi i mafiozit grek, flet Alket Rizai: S'kam dijeni për vrasjen
57- vjeçari Stafanakos u qëllua me 15 plumba
Të
paktën mua mos më ngatërroni me këtë çështje, se unë s'kisha lidhje me atë. Kishim kohë që i kishim prishur muhabetet, e nuk dua që mediat shqiptare të më përmendin. Për këtë rast më erdhi e policia e më pyeti, por unë nuk kam asnjë dijeni për vrasjen". Kështu ka deklaruar dje Alket Rizai nga burgu. Reagimi i tij ka ardhur një ditë pas vrasjes së mafiozit grek, Vasilis Stefanakos. Ky i fundit humbi jetën mbrëmjen e së mërkurës, ku është qëlluar në makinën e tij në lagjen "Hajdari" të Athinës me 15 plumba. Lajmi u përhap me shpejtësi, pasi ai njihej si organizatori i arratisjeve të Alket Rizait. Ky i fundit tha së me Vasilis Stefanakos ishin thjesht të njohur dhe se ishin akuzuar në 2006- ën bashkë, por nuk kanë asnjë lidhje me njëri- tjetrin.
Sipas mediave greke, dy persona me një motor të vjedhur i janë afruar automjetit që drejtonte 57vjeçari Stafanakos dhe e kanë qëlluar me breshëri kallashnikovi. Vasilis Ste- fanakos ishte liruar para një viti e gjysmë nga burgu, pas 8 vitesh heqje lirie. I konsideruar edhe si një nga baronët e burgjeve, ai ka kaluar një pjesë të madhe të jetës së tij pas hekurave të qelisë, ndërsa ka pasur edhe një faqe personale të internetit, të cilën e rifreskonte thuajse përditë. Atij i atribuohet ndër të tjera, roli udhëheqës në aktet e mafies greke, si dhe një marrëdhënie bashkëpunimi me anëtarët e grupit terrorist "Komploti i celulave të zjarrit". Gjithashtu, ai ishte dënuar me 21 vite e 3 muaj burg si autor i një vrasjeje, për të cilën akuzohet edhe Alket Rizai, ndërsa konsiderohet edhe si organizatori dhe financuesi i arratisjeve spektakolare të tij nga burgu famëkeq i Korridhalosë, bashkë me Vasilis Paleokostas. Në vitin 2006, ai ishte dënuar edhe me 14.5 vite për implikime në veprimtari kriminale. Polica ka hapur një proces hetimi për të gjetur se kush fshihet pas kësaj vrasjeje.