AMBASADA AMERIKANE

Ja kur mund të riaplikoni për vizë në SHBA pas refuzimit

Të

gjithë ata individë, të cilët kanë aplikuar për vizë në SHBA e janë refuzuar, duhet të bëjnë kujdes në aplikimin e dytë. Ambasada amerikane në Tiranë bën me dije se vetëm ata persona që kanë informacione të reja që tejkalojnë refuzimin e mëparshëm mund të riaplikojnë sërish brenda një kohe të shkurtër. "A duhet të aplikoni përsëri menjëherë pas refuzimit të vizës? Mos harroni, shpesh është e vështirë për aplikantët të diskutojnë informacione të reja në një kohë të shkurtër pas refuzimit të mëparshëm",- thekson ambasada në njoftimin e saj. Kjo e fundit, gjithashtu, bën me dije se viza turistike nuk është për të jetuar e punuar në Amerikë, pasi keqpërdorimi i saj ndikon në të ardhmen. Nëse kandidati ka si qëllim imigrimin, atëherë mund të shikojë mundësitë e vizave imigruese apo bashkimeve familjare, pa përjashtuar edhe lotarinë. Çdo person duhet të dëshmojë që ai ose ajo i plotëson kërkesat për kualifikim për kategorinë e vizës dhe të ketë lidhje të forta me një rezidencë jashtë Shteteve të Bashkuara. Këshilla që japin përfaqësuesit e ambasadës amerikane për të interesuarit është që të kuptojnë se refuzimi nuk është një paragjykim, apo kritikë, ndaj aplikantit personalisht. "Nëse juve ju është refuzuar viza bazuar në lidhje jo të forta jashtë Shteteve të Bashkuara, do ishte më e udhës që të prisni derisa situata juaj të ndryshojë përpara se të aplikoni përsëri për vizë, ose t'i evidentoni sa më qartë këto lidhje dhe fakte tek formulari juaj i aplikimit DS- 160", - citojnë përfaqësuesit në faqen zyrtare të ambasadës.