Rama paralajmëron punonjësit e hipotekës: Jeni të gjithë në provë
"Regjistrimi i lejeve të legalizimeve të kryhet brenda të afateve, s'ka më pingpong" Gjoni: Reformë e re për titujt e pronësisë
Kryeministri Edi Rama nuk kursen kritikat për punonjësit e Hipotekës, madje u ka bërë të ditur se janë të gjithë në provë. Gjatë një takimi ku është prezantuar me drejtorët e rinj të Hipotekave dhe të ALUIZNit në Ministrinë e Drejtësisë, Rama pohoi se të gjithë drejtorët e rinj që kanë dalë nga konkurset do të jenë në provë. "Të gjithë jeni në provë, provën s'e keni me partinë, por me popullin shqiptar, që vjen në dyert e Hipotekave. Po e ndaj Hipotekën nga ALUIZNI. Ky i fundit ka shembuj të shkëlqyer brenda sistemit që të ndahet qartë shapi nga sheqeri. Lufta ndaj korrupsionit do të vazhdojë çdo ditë. Secili nga ju duhet ta ketë shumë të qartë që paguhet nga taksat e qytetarëve. Ne kemi nisur procesin e reformës rrënjësore të titujve të pronësisë. Ne do kemi krijuar Agjencisë Kombëtare të Titujve të Pronësisë", - tha Rama. Kreu i qeverisë theksoi se këta punonjës duhet të fitojnë çdo ditë betejën që të paguhen me taksat e qytetarëve. "Kemi detyrimin moral ndaj publikut dhe vetes për të bërë më të mirën për zgjedhjen e drejtuesve të Hipotekave. Kjo është arsyeja pse jemi ' vonuar' dhe se refuzova të gjitha pretendimet për ndërhyrje në këto konkurse, pasi siç e thashë, askush dhe as ligji nuk na detyronte që të bënim konkurse. Dua ta bëj të qartë edhe për ata që hedhin promuze dhe shfaqin skërmitjet e cinizmit në publik, se një drejtor këtu dhe aty na paska qenë kontribuues i PS në fushatën paraardhëse. Këto procese nuk përfaqësojnë socialistët, pro u japin mundësi të gjithëve të përfshihen. Për ne duhet të jesh i gatshëm dhe i aftë. Ashtu siç kam besim se është bërë zgjedhja më e mirë e mundshme kur është zhvilluar ky proces, kam bindjen se jemi ne të parët, Ministria e Drejtësisë, e gjithë struktura përgjegjëse që duhet të bëjë verifikime të zgjedhjeve", - tha Rama.
REGJISTRIMI
Regjistrimi i lejeve të legalizimit në Hipotekë duket së do të jetë fokusi i punës në këtë institucion. Kryeministri u bëri të ditur punonjësve të Hipotekës se çdo leje e paregjistruar është nënshkrim dorëheqjeje. "Për t'i dhënë fund pingpongut të ecejakeve, që ALUIZNI ta njeh dhe Hipoteka s'ta jep. Ne sot nuk jemi vetëm, edhe pse aleatin që e kemi zgjedhur dhe e duam më të fuqishëm në këtë proces, që është njeriu i zakonshëm, s'e kemi ende në atë pozicion që me siguri do ta kemi në vijim. Ka ende dyshime se platforma e bashkëqeverisjes funksionon. Janë 35 punonjës Hipotekash që janë larguar nga detyra dhe po përballen me ligjin", tha Rama.
MINISTRIA
Në takim ministrja Etilda Gjonaj vuri theksi te pritshmëritë që do të kenë nga këta drejtorë në zgjidhjen e çështjeve me pronat. "Ky është vetëm hapi i parë i reformës në trajtimin e titujve të pronësisë, i cili do të pasohet me një vlerësim të stafit lidhur me përputhshmërinë e formimit të tyre profesional me pozicionin e punës. Reforma e pronës është një ndër reformat më të rëndësishme të këtij mandati, e cila do të ndiqet me një proces të mirëstudiuar për trajtimin e integruar të titujve të pronësisë. Pritshmëritë tona dhe të qytetarëve janë të larta dhe sfida më e mad- he e të gjithëve bashkë është që të ndryshojmë njëherë e mirë imazhin e zyrave të titujve të pronësisë për t'i kthyer ato në mënyrë reale vetëm në shërbim të qytetarëve dhe për t'u dhënë fund një herë e mirë abuzimeve që bëhen në kurriz të qytetarëve. Jemi të vendosur që aleatit tonë, që janë qytetarët, t'u realizohen të drejtat pa asnjë cenim dhe se detyra e secilit nga ju është që të angazhohet maksimalisht për të arritur këtë synim", - tha Gjoni.