KUMBARO ME SHKOLOLLIN: KONKURS NDËRKOMBËTAR PËR GODINËN E GALERISË KOMBËTARE
Është
prezantuar dje zyrtarisht drejtori i ri i Galerisë Kombëtare të Arteve. Erzen Shkololli u prezantua përpara stafit të GKA nga ministrja e Kulturës, Mirela Kumbaro dhe zv. ministrja Valbona Shujaku. Pasi falënderoi ish- drejtorin Artan Shabani për bashkëpunimin në këto 4 vite, Kumbaro i uroi suksese drejtorit të sapoemëruar, duke e cilësuar këtë si një moment të ri për institucionin kombëtar të artit pamor, i cili u prin edhe një nga projekteve më të rëndësishme, atij të rikonstruksionit të Galerisë. Ndër të tjera, ministrja e Kulturës tha se, "GKA është një ndër tri institucionet që këtë vit janë prioritet qeveritar dhe do të jemi së bashku për të realizuar një projekt nga e para për rehabilitimin e GKA- së. Puna tashmë ka filluar për të shkuar drejt një konkursi ndërkombëtar të një projekti të ri, siç do të veprojmë edhe me Muzeun Historik Kombëtar. Duke i uruar punë të mbarë drejtorit të ri, e sigurojmë atë se do t'i gjendemi pranë gjatë punës së tij", u shpreh ministrja e Kulturës.
Ndërsa drejtori i ri Shkololli shprehu mirënjohjen për besimin që qeveria shqiptare i dha në drejtimin e GKA- së dhe theksoi se puna e tij do të fokusohet në rritjen e nivelit të prezantimit të artit shqiptar jashtë kufijve.
"Do e shtyj artin pamor që të ketë këtë hov në skenën ndërkombëtare, por gjithmonë dhe asnjëherë pa i harruar talentet vendorë, që besoj se kanë kontribuar më së miri me produktin më të mirë, që mundet t'i japë dikush shtetit në nivel ndërkombëtar. Besoj se kjo është qasja që GKA duhet të frymojë në të ardhmen, për vitet që na presin", u shpreh Shkololli. Artist e kurator, në vitet 2011- 2015 ka drejtuar Galerinë Kombëtare të Kosovës. Shkololli ka kuruar një numër të madh ekspozitash si në Kosovë, Shqipëri dhe Europë, së fundmi si këshilltar kuratorial i ekspozitës "Dokumenta 14", e cila u hap vitin që shkoi në Athinë dhe Kassel. Gjatë vitit 2016 Shkololli ka qenë këshilltar kuratorial në Tiranë në Qendrën për Hapje dhe Dialog pranë Kryeministrisë.