"LONELY PLANET": SHQIPËRI, NË RREZIK KISHAT E VOSKOPOJËS DHE VITHKUQIT

Lonely Planet" ka publikuar një lajm, ku duke cituar "Europa Nostra"- n i rendit kishat e Voskopojë dhe Vithkuqit mes 12 siteve të rrezikuara të 2018- ës, sikundër edhe Gjirokastrën, për të cilën jep linkun ku mund të lexohet lista e "Europa Nostra"- s. Ndonëse ka qenë një organizatë shqiptare që e ka bërë nominimin, tanimë, kishat postbizantine dhe siti i Gjirokastrës, mbrojtur nga UNESCO, të vëna nga "Europa Nostra" në listë rreziku duket se do bëjnë xhiron me mediave që merren kryesisht me turizmin. Nën titullin "Sitet e trashëgimisë kulturore më të rrezikuara në Europë tani në qendër të vëmendjes", "Lonely Planet" thotë se 12 monumente janë shtuar në listën e shkurtër të këtij viti për vendet më të rrezikuara të trashëgimisë së Evropës. "Sitet e nominuara janë në dhjetë shtete të ndryshme dhe ekzistenca e tyre është në rrezik; disa nga neglizhimi, ose nga keqmenaxhimi, zhvillimi apo thjesht nga mungesa e burimeve", shkruan LP, gjigandja amerikane e turizmit, "Lonely Planet". "Kjo listë e shkurtër është para së gjithash, një thirrje për veprim", është shprehur Denis de Kergorlay, presidenti ekzekutiv i "Europa Nostra"- s. "Ne nxisim palët publike dhe private në nivel lokal, kombëtar dhe evropian të bashkojnë forcat për të shpëtuar pjesë të trashëgimisë, që tregojnë historinë tonë të përbashkët dhe që duhet të ruhen për gjeneratat e ardhshme". Lista u hartua nga një panel ekspertësh, me njohuri për fusha si historia, arkitektura, konservimi dhe arkeologjia. Secili prej vendeve u zgjodh si për vlerën e tyre unike kulturore, edhe për shkallën e rrezikut me të cilin përballen. Ekspertët gjithashtu besojnë se secili prej siteve ka aftësinë për të siguruar zhvillim të qëndrueshëm socio- ekonomik për komunitetin lokal", shkruan "Lonely Planet".