Meta: Paketë e përbashkët projektesh strategjike për të gjithë rajonin
Presidenti në Forumin Ekonomik: Rrugëtimi i Shqipërisë drejt BE, jo i ndarë nga të tjerët "Stabilitet politik, për një model të mirë ekonomik"
Presidenti i Republikës, Ilir Meta, tha dje gjatë fjalës në edicionin e parë të Forumit Ekonomik të Tiranës "Ballkani i së ardhmes, drejt një përfshirjeje globale" se vendet e rajonit duhet të krijojnë një platformë të unifikuar të investimeve strategjike. Kjo sipas, presidentit të vendit do të ishte një strategji e zgjuar, në mënyrë që i gjithë rajoni të shikohet si një i vetëm për biznesin e korporatave multinacionale apo për projektet madhore me impakt rajonal. "Procesi i vrullshëm dhe i pandalshëm i globalizimit na dikton nevojën për bashkëpunim më të ngushtë dhe krijimin e një zone të përbashkët ekonomike, e cila do t'i dërgonte Bashkimit Evropian si dhe tregjeve të tjera më të zhvilluara në botë mesazhin e potencialit shpresëdhënës dhe të paeksploruar të një tregu me mbi 20 milionë konsumatorë, i cili koordinohet për të krijuar vlerë të shtuar në çdo hallkë të zinxhirit të zhvillimit ekonomik", tha Meta në këtë forum, ku morën pjesë njerëz të biznesit, qeveria e përtej kufijve. "Është evidente se ekonomia globale tashmë ka një dinamikë multi- polare, e udhëhequr nga disa superfuqi ekonomike dhe disa ekonomi emergjente. Në këtë kontekst, ekonomitë e Ballkanit nuk kanë ' luksin' për t'u angazhuar në ' gara individuale' dhe afatshkurtra duke konkurruar me njëri- tjetrin për dominancë tregu apo atraktivitet investimesh të huaja", tha më tej Meta. Ai shtoi se në kontekstin e bashkëpunimit rajonal mbetet e domosdoshme të përmirësohen strategjitë kombëtare për t'i dhënë rëndësinë e duhur, përfundimit në kohë të projekteve kryesore infrastrukturore rajonale. Meta propozoi hartimin sa më parë të "një pakete të përbashkët" projektesh strategjike për të gjithë rajonin, si dhe orientimin e eksporteve drejt sektorëve që maksimizojnë vlerën e shtuar si dhe drejt tregjeve më të qëndrueshme dhe më të afërta si Gjermania apo Evropa e Veriut. "Rrugëtimi i Shqipërisë drejt Bashkimit Evropian nuk mund të jetë kurrsesi një proces i mëvetçëm dhe i shkëputur nga rrugëtimi i vendeve të tjera të Ballkanit Perëndimor, ndaj nevojitet koordinim i plotë institucional edhe në raport me politikat e zhvillimit. Gjithash-
tu, garantimi i një modeli të suksesshëm ekonomik kërkon domosdoshmërish forcimin e mëtejshëm të stabilitetit politik të të gjithë rajonit, ndaj është e domosdoshme të shtohen përpjekjet për një zgjidhje sa më të shpejtë të problemit midis Maqedonisë dhe Greqisë, me mundësinë e shkëlqyer të anëtarësimit të saj më të fund në NATO apo dhe normalizimit të plotë të marrëdhënieve midis Kosovës dhe Serbisë", tha presidenti.
"Pavarësisht reformave të ndërmarra në më shumë se dy dekada, produktiviteti në ekonomitë tona vazhdon të mbetet relativisht i ulët, ndër të tjera edhe për shkak të nivelit të ulët të integrimit financiar, nivelit të lartë të informalitetit, kostos së lartë të kapitalit shoqëruar edhe me mungesën e një force punëtore të mirëkualifikuar, e denjë për t'iu përgjigjur dinamikës në tregun e punës në përputhje me nevojat e sektorit privat", tha Meta. Guvernatori i Bankës së Shqipërisë, Gent Sejko, gjatë fjalës së tij në Forumin Ekonomik të Tiranës tha: "Ne kemi probleme me mjedisin e biznesit, përfshirë korrupsionin dhe informalitetin. Këto probleme janë ndër më kryesoret në listën e pengesave për rritjen ekonomike si në Shqipëri, ashtu edhe në rajon".