Serbia në BE, Edi Rama: Është më përpara, por duhet të njohë Kosovën
Kryeministri në Davos takon homologun belg e Mbretin e Jordanisë "Presim me padurim të nisim negociatat këtë vit"
Kryeministri Edi Rama u takua dje në Davos të Zvicrës me drejtues shtetesh të ndryshëm. Një prej tyre ishte edhe me presidentin serb, Aleksa- ndër Vuçic, madje ai foli edhe për median serbe. Kryeministri ngriti supozimin që Shqipëria të hyjë në të njëjtën kohë me Serbinë në BE, por ajo të njohë Kosovën. Ndërsa merr pjesë në Forumin Ekonomik Botëror në Davos, kryeministri Rama u takua me kryeministrin belg Charles Michel, si edhe me Mbretin e Jordanisë, Abdullah II. Rama nënvizoi gjatë takimit me kryeministrin belg vullnetin e qeverisë për të hapur negociatat për anëtarësim të Shqipërisë në Bashkimin Europian, ndërkohë që e njohu kryeministrin belg me hapat e ndërmarra në përmbushje të prioriteteve kyçe e në veçanti me ecurinë e reformës në drejtësi dhe vetingun. Ndërsa në takimin me Mbretin e Jordanisë, Abdullah II, ai bisedoi mbi sfidat e përbashkëta kundër ekstremizmit të dhunshëm. Kryeministri Rama e informoi mbretin Abdullah në lidhje me Qendrën Rajonale Kundër Ekstremizmit të Dhunshëm, e cila është gati për të nisur aktivitetin e saj në Shqipëri. Mbreti Abdullah e falënderoi kryeministrin Rama për mbështetjen dhe të gjitha përpjekjet e bëra në luftën kundër ekstremizmit të dhunshëm, si dhe ofroi të gjithë ndihmën dhe mbështetjen e Mbretërisë së Jordanisë për Qendrën Rajonale në Tiranë. Në fokus të bashkëbisedimit miqësor ishte organizimi në pranverë në Shqipëri, i një takimi ndërkombëtar shumëpalësh mbi sigurinë rajonale dhe ndërveprimin kundër ekstremizmit të dhunshëm ( në kuadër të iniciativës globale të Akaba- s, nismë e Madhërisë së Tij).
INTERVISTA PËR MEDIAT SERBE
Kryeministri Edi Rama: Sigurisht, Europa nuk është në formën e saj më të mirë, por lajmi i mirë është se ajo është në një moment ndërgjegjësimi rreth nevojës për të qenë në një formë më të mirë. Kjo është një periudhë tranzicioni shumë inkurajuese nga një e kaluar e zymtë, në diçka më të ndritshme.
Po fjalimi i kancelares Anxhela Merkel, a ishte gjithashtu inkurajues, si mendoni?
Ajo është gjithmonë inkurajuese. Ajo është e vetmja, e cila mbajti gjallë jo vetëm Europën, por edhe vlerat europiane, parimet europiane dhe ëndrrën europiane, duke qëndruar e fortë në një moment shumë të vështirë, kur Gjermania u përball me krizën dramatike të refugjatëve dhe ajo nuk luajti politikisht me këtë gjë.
Çfarë prisni nga vizita e Presidentit Trump nesër dhe pasnesër?
Po pres me kuriozitet të dëgjoj presidentin dhe jam shumë shpresëplotë që
përsëri, ajo çfarë thashë për Europën është e njëjtë për SHBA- të, janë dy aleatët e mëdhenj strategjikë të Shqipërisë, por janë dy faktorë të mëdhenj në të gjithë rajonin, mendoj unë. Është shumë e rëndësishme që Shtetet e Bashkuara të vazhdojnë të luajnë një rol strategjik në rajonin tonë, si edhe shtetet vetë të ecin drejt një të ardhmeje më të mirë.
A prisni ju që Serbia dhe Shqipëria do të hyjnë së bashku në BE, apo ka disa parashikime që ndoshta Serbia mund të hyjë në BE
para Shqipërisë? Çfarë mendoni për këtë?
Është një proces i bazuar tek merita dhe ndërsa flasim Serbia është më përpara, sepse Serbia tashmë është duke negociuar dhe ne jemi duke pritur me padurim të nisim negociatat këtë vit. Por është një garë e shëndetshme, le të themi. Po, ne duam shumë të kemi një ecuri shumë më të shpejtë dhe pse jo të jemi thjesht në të njëjtën pozitë në të ardhmen dhe pse jo të hyjmë në BE së bashku, me presupozimin që Serbia të njohë Kosovën.