Bashkimi i faktorëve të djathtë, Mediu: Kthim të themeluesve të PD e PR
"Më 27 janar ta tundim nga themelet qeverinë"
Kreu
i PR- së, Fatmir Mediu, nga asambleja e kësaj partie kërkoi dje bashkimin e të gjithë faktorëve të djathtë, ndërsa u bëri thirrje qytetarëve të bashkohen për largimin e Edi Ramës. Mosreagimi i opozitës dhe heshtja e ndërkombëtarëve sipas Mediut do të shkatërronte prespektivën evropiane të vendit. "Këto ditë të ftojmë çdo qytetar që nuk pranon varfërinë, krimin, pasigurinë, nuk pranon manipulimin e votës, shkatërrimin e Kushtetutës. Të gjithë ata qytetarë që besojnë tek puna e ndershme, forca e punës së tyre, që besojnë se janë zot të fatit të tyre t'i bashkohen protestës sonë paqësore të 27 janarit për të shembur murin e krimit dhe korrupsionit të ndërtuar nga kjo qeveri", tha z. Mediu. Ai kërkoi bashkimin e gjithë faktorëve të djathtë. "Të gjejmë të gjitha rrugët që idetë tona t'i bashkëshoqërojmë me marrëdhënie permanente me atë që është shtylla kurrizore e së djathtës, me të përndjeku- rit politikë, pronarët, rininë, intelektualët, biznesin. Këto grupe interesi duhet të gjejnë të gjithë hapësirën të përfshihen në vendimmarrjen e konkurrimin politik të së djathtës. Opozita është shumë më tepër se numrat e deputetëve në Kuvend apo numrat e anëtarëve të partive tona", tha z. Mediu. Thirrjes për të protestuar kundër qeverisë në 27 janar, aleati historik i demokratëve, Fatmir Mediu i bashkëngjiti nga asambleja e Partisë Republikane edhe një mesazh për Lulzim Bashën. Në krah të njërit prej themeluesve të Partisë Demokratike, ish- ministrit dhe ish- deputetit Besnik Mustafaj, Mediu shtroi nevojën e rikthimit të të larguarve nga Partia Demokratike. "Përveçse të protestosh, duhet edhe të ndërtosh nevojën e padiskutueshme të rivlerësimit dhe kthimit të kontributeve, themeluesve të PD e PR, të kontributeve përfaqësuese të së djathtës, që kanë qenë në nivel lokal apo qendror. Historia na ka treguar se kur kemi qenë të bashkuar, kemi ndërtuar suksesin tonë, jo politik, por të Shqipërisë", - tha z. Mediu. Ideja e bashkimit të së djathtës u mbështet edhe nga Mustafaj, i cili pavarësisht ndasive me kreun e demokratëve, mbështet idenë e protestës. Mediu tha se në 27 janar opozita dhe shqiptarët do të protestojnë për zgjedhje të lira e të ndershme, një drejtësi të pakapur politikisht dhe mirëqenie.