Gjiknuri: Aeroporti i Vlorës, 100 milionë euro me investim privat
Miratohet projektligji, ministri: Ndërtimi do të përfundojë brenda vitit Negocimi i kontratës 90 ditë, më pas nënshkrimi
Këshilli i Ministrave miratoi një projek tligj që autorizon fillimin e negociatave me konsorciumin e përbërë nga tri kompani turke për ndërtimin e aeroportit të Vlorës. Detajet i bëri të ditura ministri për Infrastrukturën dhe Energjinë, Damian Gjiknuri gjatë një dalje para mediave. "Qeveria kaloi me procedurë të përshpejtuar një projektligj që do të shkojë dhe në Kuvend lidhur me fillimin e negociatave me një nga konsorciumet me ofertën më serioze për aeroportin e Vlorës. Me këtë i hapim rrugë një prej projekteve më të mëdhenj të infrastrukturës ajrore. Janë tri kompani të mëdha turke që në bashkimin e tyre janë të njëjtat që po ndërtojnë aeroportin e Stambollit kurse studimi i fizibilitetit për aeroportin e Vlorës është përgatitur nga një kompani amerikane"- tha Gjiknuri. Ashtu sikurse ka nënvizuar edhe pak ditë më parë kreu i MIE tha se financimi për këtë aeroport që do të jetë ndërkombëtar është privat dhe se kostoja llogaritet në 100 milionë euro. "Në vendim parashikohet një grup negociator me përfaqësues nga MIE dhe asaj për Financat dhe Ekonominë që në një periudhë 90ditore do të negociojnë për kontratën dhe më pas do të vijohet me nënshkrimin e saj. Ky aeroport nuk do të jetë i vetmi dhe do punojmë edhe për aeroportin e Kukësit. Po kështu po përfundojmë dhe studimin e fizibilitetit për aeroportin e Sarandës, që do të jetë i orientuar tek turizmi",- tha Gjiknuri. Ministri u shpreh se punimet do të nisin brenda këtij viti por kreu i qeverisë Rama është shprehur më optimist duke vendosur si afat për nisjen e punimeve qershorin e këtij viti, sigurisht nëse gjithçka do të ecë sipas hapave të parashikuar në vendim.
VENDIMI
Këshilli i Ministrave vendos përcaktimin e procedurës së veçantë për negocimin dhe lidhjen e kontratës, ndërmjet shtetit shqiptar dhe shoqërive "Cengiz Construction & Kalyon & Kolin construction", me objekt projektimin, ndërtimin, operimin, mirëmbajtjen dhe menaxhimin e aeroportit të qytetit të Vlorës. Ky ligj përcakton procedurën e veçantë për negocimin dhe lidhjen e kontratës, ndërmjet shtetit shqiptar dhe shoqërive "Cengiz Construction & Kalyon & Kolin Construction", me objekt projektimin, ndërtimin, operimin, mirëmbajtjen dhe menaxhimin e aeroportit të qytetit të Vlorës. Ministri i Infrastrukturës dhe Energjisë dhe ministri i Financave dhe Ekonomisë dërgojnë për miratim në Këshillin e Ministrave projektligjin e hartuar nga komisioni i negocimit të kontratës, brenda 10 ditëve nga data e nënshkrimit të saj. Kontrata miratohet nga Kuvendi i Republikës së Shqipërisë.