Opozita e bashkuar, mijëra në shesh kundër qeverisë

Surprizat e protestës dyorëshe, nga dordolecët tek "Audi" AA 003 GB Nga fshesa e tepsitë, deri te kurorat me kanabis

Opozita e bashkuar për afro 2 orë protes toi dje paqësisht në bulevardin "Dëshmorët e Kombit" kundër qeverisë "Rama" duke mbledhur mijëra mbështetës në sheshin para Kryeministrisë. Slogani i opozitës së bashkuar ishte "Kundër qeverisë së varfërisë dhe padrejtësive". Simbolet partiake u zëvendësuan me flamurin kombëtar, atë të SHBA- ve e BE- së. Protesta nisi rreth orës 12: 00 dhe u mbyll brenda dy orësh. Përveçse disa kapsollave që bënë zhurmë dhe tym, nuk u regjistruan përplasje apo incidente të tjera gjatë saj. Krerët e opozitës protestuan bashkë me familjet e tyre si shenjë të demonstrimit paqësor para godinës së Kryeministrisë.

DORDOLECËT

Protesta e radhës e opozitës bëri dallimin për simbolikat e shumta që u shfaqën përgjatë orëve të saj. Pjesëmarrësit nga rrethet vendosën në makina e furgonë targën e makinës së ishministrit të Brendshëm, Saimir Tahiri, të cilën ua shiti vëllezërve Habilaj. Automjeti me targa AA003GB, sipas përgjimeve të prokurorisë italiane përdorej për trafikun e lëndës narkotike. E veçantë këtë radhë ka qenë edhe kurora me diametër 2 metra e zbukuruar me gjethe hashashi, në krye të së cilës është portreti i kryeministrit Rama i shoqëruar me portretet e Saimir Tahirit, Moisi Habilajt, Emiljano Shullazit, Lul Berishës dhe Klement Balilit. Me anë të dordolecëve gjithashtu janë denoncuar figura të lidhura me krimin të veshur me uniforma të burgut. Nuk mungoi edhe personazhi i veshur me të bardha me mbishkrime

kundër qeverisë "Rama". Të rinj të LSI- së kanë zgjedhur që të mbajnë në duar tepsi me foto të kryeministrit Edi Rama. Emigrantët gjithashtu kanë pasur mesazhin e tyre për qeverinë "Rama 2". Simbol në protestë ishin edhe

fshesat, me të cilat të rinjtë demokratë tregojnë e do të largojnë qeverinë e Edi Ramës.

KAPSOLLAT

Protestuesit e opozitës hodhën kapsolla dhe fishekzjarrë në drejtim të Kryemi- nistrisë gjatë protestës. Ndërsa Florenc Hoxha, ishkreu i policisë bashkiake, një prej organizatorëve të protestës, është përfshirë në një incident me një grua të moshuar, e cila bëri thirrje kundër protestës gjatë kohës që po fliste Lulzim Basha. "Po ky pse flet, ky që ka vrarë në 21 janar", u shpreh e moshuara, e cila është larguar nga Florenc Hoxha në drejtim të kordonit të policisë. Është dashur ndërhyrja e policisë për të normalizuar situatën, duke shmangur kështu përplasjen e së moshuarës me protestuesit. Policia e largoi gruan e moshuar nga turma e protestuesve. Përgjithësisht protesta e opozitës kaloi pa incidente, ndërsa qetësisht mijëra mbështetës të PD janë shpërndarë. Në përfundim të protestës vetë Partia Demokratike publikoi një video të regjistruar me dron, që tregonte pjesëmarrjen e protestuesve në bulevardin "Dëshmorët e Kombit", ndonëse ende nuk është publikuar zyrtarisht se sa ishte numri i pjesëmarrësve.

PANKARTAT

Në përfundim të tubimit që opozita zhvilloi para Kryeministrisë, protestuesit lanë pas pankartat, fshesat, kanaçet e birrave dhe sendet e tjera. Protestuesit nuk hodhën tymuese, por vetëm disa kapsolla duke mbyllur tubimin me incidente të vogla. Shishe plastike, letra, farat dhe tabelat bashkë me shkopinjtë e marrë me vete ishin hedhur tek pemët, ndërsa edhe flamuri i Bashkimit Europian i hedhur në tokë. Pas largimit të protestuesve nga bulevardi para Kryeministrisë, punonjësit e bashkisë kanë nisur punën për të pastruar ato që ata lanë pas për rikthimin e tij në gjendjen fillestare.