Trafiku i drogës nga Shqipëria në Itali, kapen 2 organizatorët e grupit kriminal
Operacioni ndërkombëtar i koduar "Overseas", shpallen në kërkim edhe dy të tjerë Autor Deda e Dodë Prela nga Lezha u arrestuan pas 5 vitesh hetime me autoritetet italiane
Një rrjet i trafikimit të drogës nga Shqipëria në Itali është zbuluar dhe shkatërruar nga Policia e Shtetit në bashkëpunim me atë italiane. Pas 5 vitesh hetime intensive u bë i mundur finalizimi i operacionit të koduar "Overseas", gjatë të cilit u arrestuan dy persona nga Lezha. Bëhet fjalë për 38- vjeçarin Autor Deda ( alias Lesaj), banues në këtë qytet si dhe 53- vjeçari Dodë Prela, lindur në Krujë dhe banues në Lezhë. Burime zyrtare nga policia dje bënë me dije se njëri nga dy personat në fjalë u kap në Tiranë, ndërsa tjetri në Lezhë. Sipas këtyre burimeve, Deda dhe Prela, u kapën pasi dyshohet të jenë financuesit dhe organizatorët kryesorë të trafikut ndërkombëtar të drogës. Ndërkaq, janë shpallur në kërkim shtetasit: R. M., 41 vjeç, banues në Kurbin dhe G. K., 47 vjeç, banues në Lezhë. Gjithashtu, mësohet se nga hetimi disavjeçar, i cili është shtrirë në Shqipëri dhe Itali si rezultat i bashkëpunimit të ngushtë mes partnerëve ligjzbatues është bërë e mundur që në periudha të ndryshme kohore, këtij grupi kriminal t'i sekuestrohen sasi të konsiderueshme marijuane.
OPERACIONI ANTIDROGË
Burimet policore pohuan se operacioni u realizua mes Policisë së Shtetit, Prokurorisë së Krimeve të Rënda dhe policisë italiane, me metoda speciale të hetimit dhe se zgjati disa vjet. "Në kuadër të procedimit penal të vitit 2013, Drejtoria për Hetimin e Narkotikëve dhe Trafiqet, në bashkëpunim me Drejtorinë e Forcës së Posaçme Operacionale, Drejtorinë Vendore të Policisë Lezhë dhe Prokurorinë pranë Gjykatës së Shkallës së Parë për Krime të Rënda Tiranë finalizuan operacionin policor të koduar ' Overseas'", thuhej në njoftimin zyrtar të policisë. Po të njëjtat burime sqaruan se për dy personat e shpallur në kërkim, Prokuroria pranë Gjykatës së Shkallës së Parë për Krime të Rënda, Tiranë, ka urdhëruar në datë 25 janar 2018 ekzekutimin e vendimit të datës 17.01.2018 të Gjykatës së Shkallës së Parë për Krime të Rënda Tiranë, e cila ka vendosur masën e sigurimit personal "Arrest në burg", për veprën penale: "Trafikim të narkotikëve", kryer në bashkëpunim. Gjithashtu, burime policore sqaruan se këtij grupi kriminal i janë sekuestruar ndër vite sasi të konsiderueshme lëndë narkotike e llojit marijuanë, të trafikuara nga Shqipëria në drejtim të Italisë, në rrugë detare. Sipas bluve, në kohë janë arrestuar edhe shtetas të tjerë. Nga hetimet e zhvilluara ka rezultuar dyshimi i arsyeshëm, i bazuar në prova, se në marrëveshje mes tyre Dodë Prela dhe Autor Deda janë financuesit dhe organizatorët kryesorë të këtij trafiku. Shtetasi R. M. ishte në rolin e personit që siguronte tregun e shitjes së lëndës narkotike në Itali, ndërsa shtetasi G. K. ka qenë në rolin e magazinuesit të lëndës narkotike. Në rolin e transportuesit të arrestuar më parë janë shtetasit: L. M., E. Z. dhe J. LL., të tre nga qarku Lezhë. Ndërsa, vijojnë hetimet për dokumentimin e plotë të veprimtarisë kriminale të këtyre shtetasve, si dhe identifikimin e bashkëpunëtorëve të tjerë të mundshëm. Materialet do t'i kalojnë për ndjekje të mëtejshme Prokurorisë pranë Gjykatës së Shkallës së Parë për Krime të Rënda, Tiranë.