Erdogan takon Papën, vizita e parë pas 59 vitesh
Vizita në Romë e kreut të Turqisë, kurdët e presin me protesta Presidenti turk për "La Stampa": BE të mbajë premtimin
Ditën e djeshme, në Vatikan nisi takimi kokë më kokë mes presidentit të Turqisë, Recep Tayyip Erdogan dhe liderit shpirtëror të katolikëve, Papa Françeskut, raporton Anadolu Agency ( AA). Papa priti presidentin Erdogan në hyrjen e Sallës së Bibliotekës në Pallatin Apostolik, ku lideri i botës katolike pret mysafirët. "Ju faleminderit për kujdesin", është shprehur presidenti Erdogan, ndërkohë që edhe Papa ka falënderuar presidentin turk për vizitën. Erdogan dhe Papa Françesku shtrënguan duart para përfaqësuesve të mediumeve, ndërsa më pas kaluan në Sallën e Bibliotekës, ku mbajtën takimin kokë më kokë, i cili u zhvillua në dyer të mbyllura për mediumet. Kjo është vizita e parë e një presidenti turk pas 59 vitesh që viziton Vatikanin. Mësohet se temë kryesore mes presidentit turk dhe Papës është terrorizmi dhe vendimi për Jerusalemin. Vizita e Erdigan në Vatikan është shoqëruar me masa të forta sigurie. Në Romë duke nisur nga dita e djeshme e deri në largimin e Presidentit Erdo? an në qytet ishin në detyrë 3.500 forca të sigurisë. Siguri e lartë sikurse për Trumpin apo Putinin. Të njëjtat masa edhe për presidentin turk Rexhep Taip Erdoan në Romë. Vizitën zyrtare në Itali e nisi në Vatikanin që nuk vizitohej nga presidentët e Turqisë prej 6 dekadash. Takimi me Papa Françeskun zgjati për 50 minuta, ku tema kryesore të diskutimit ishin Jerusalemi, që administrata Trump e njohu si kryeqytet të Izraelit, por edhe çështjet e të drejtave të njeriut. Shkëmbyen së bashku edhe dhurata. Panoramës së Stambollit në qeramikë që i dhuroi Erdoani, Papa Françesku ia ktheu me një medaljon të Engjëllit të Paqes, që largon djajtë e luftës. Një dhuratë domethënëse, teksa Turqia po kryen në sulm ushtarak në Siri kundër militantëve kurdë. Edhe në Romë, Erdoanin e ndoqën protestat e kurdëve, ku në përleshjet me policinë italiane pati edhe të plagosur. Në një intervistë për mediat italiane Erdoan kërkoi nga Bashkimi Europian t'i mbajnë dyert e hapura për Turqinë. Por në përgjigjen nga Brukseli thuhej se kjo është ende larg, pasi nuk është konstatuar asnjë përmirësim me të drejtat e njeriut çka do të pasqyrohet në raportin e prillit. Ndonëse policia italiane kishte marrë një sërë masash për vizitën e presidentit turk në Romë, dhe ishin ndaluar protestat, një gjë e tillë ka ndodhur. Komuniteti kurd ka manifestuar sot në Romë kundër vizitës zyrtare të Presidentit turk Rexhep Taip Erdogan në Itali. Protesta e tyre është zhvilluar në kështjellën "Sant'Angelo" jashtë zonës së blinduar nën masa mjaft të larta nën kontrollin e policisë italiane, për të garantuar sigurinë e vizitës së presidentit turk. Nën thirrjet e parullat "Erdogan vrasës", "Larg duart nga Kurdistani", i janë bashkuar kësaj proteste mjaft aktivistë të organizatave joqeveritare italiane në mbrojtje të lirive e të drejtave njerëzore. Një prej manifestuesve ka propozuar, duke marrë me vete turmën, për të vazhduar protestën në Vatikan ku po zhvillohej dhe vizita. Ndërkohë që, nga ana tjetër, Presidenti Rexhep Tajip Erdoan i kërkon BE- së që të mbajë premtimin lidhur me aderimin e Turqisë. Në një intervistë për të përditshmen italiane "La Stampa", gjatë një vizite zyrtare që po zhvillon në Romë, ai, gjithashtu, tha se duhet të ruhet statusi i qytetit të Jerusalemit. "Pranimi i Turqisë në BE nuk mund të flijohet në llogaritjet e politikës së brendshme - tha ai - dhe Jerusalemi nuk është thjesht një çështje e myslimanëve". Sipas presidentit turk, statusi i këtij qyteti "duhet të ruhet bazuar në rezolutat e OKB- së, duke siguruar që myslimanët, të krishterët dhe hebrenjtë të jetojnë në paqe krah për krah". Kreu i shtetit turk flet edhe për ndërhyrjen turke në provincën siriane Afrin: "Luftojmë vetëm terroristët dhe kemi të drejtë ta bëjmë këtë". Ai siguron që Ankaraja do të kontribuojë në integritetin territorial të Sirisë. Gjithashtu, përsërit se nuk është pushtues. Sa i përket Libisë, Erdogan thotë se "Turqia mbështet integritetin territorial libik dhe unionin e saj politik". Presidenti turk rikujton që Roma dhe Ankaraja kanë rinisur aktivitetet në ambasadat e tyre në Tripoli dhe premtoi se shumë shpejt do të jetë operativ një grup pune i përbashkët për të zgjidhur krizën e brendshme.