Vrasja e Kasmit, ' Kathimerini': U urdhërua nga shqiptar në burgjet greke
Gjykata: Ish- speciali e Meshini do të qëndrojnë në paraburgime të ndryshme "Ja dosja penale e ekzekutorit të 41- vjeçarit"
Mediat greke nxjer rin detaje të reja në lidhje me ekzekutimin e Devi Kasmit pasditen e 29 janarit në kryeqytet. ' Kathimerini' shkruan se vrasja e 41- vjeçarit dyshohet se është urdhëruar nga shqiptarë të dënuar për trafik droge në burgjet greke. Media greke në lidhje me këtë informacion iu referohet zyrtarëve të lartë të policisë që po ndjekin çështjen. Ndërkohë sipas hetimeve, ka qenë pikërisht greku Efthymoius, i cili cilësohet si vrasës me pagesë, ai që kreu ekzekutimin. Sakaq ditën e djeshme gjykata e Tiranës vendosi që shtetasi grek Efthymio Efthymious, të mos qëndrojë në të njëjtin paraburgim me 23vjeçarin Mario Meshini, i cili u arrestua si bashkëpunëtor. Ky vendim do të jetë në fuqi të paktën deri në përfundim të hetimeve. Me vendim të gjykatës, Mario Meshini do të qëndrojë në paraburgimin 302 në Tiranë, ndërsa ish- speciali grek në paraburgimin e Bradasheshit në Elbasan, bashke me 3 personat e tjerë që akuzohen si bashkëpunëtorë. Gjykata e Krimeve të Rënda ka vendosur masën e sigurisë "arrest me burg" për Efthymio Efthymious, Elton Halipaj, Malvin Dinellari dhe Elton Hoxhallarin si të dyshuar për vrasjen e Devi Kasmit. Gjithashtu, do të qëndrojë në burg edhe 25vjeçari Mario Meshini për të cilin ekzistojnë dyshime se ka nxjerrë në prite Kasmin, pranë shtëpisë që ky i fundit e përdorte si bazë për trafikun e drogës.
GREKU EFTHYMIO EFTHYMIOUS
Ish- agjenti special grek, Efthymious ka shërbyer si roje në ambasadën shqiptare në Athinë, si edhe për mbrojtjen e objekteve publike në sheshin "Sintagma". Mësohet se greku në vitin 2008 është arrestuar për trafik klandestinësh drejt Greqisë. Ndërkohë në vitin 2009 në Frankfurt u kap me 5.5 kg kokainë që vinte nga Venezuela. Media greke raporton se Efthymiou u lirua nga policia në vitin 2012. Por duket se aktivitetet kriminale të grekut vijojnë, pasi ish- speciali u arrestua në 2016 në Artë për trafik droge dhe qëndroi në burg 10 muaj. Në gjyqin që u bë në 2017 në Janinë, ranë akuzat se bëhej fjalë për një grup kriminal, dhe të pandehurit e tjerë u shpallën të pafajshëm përveç Efthymiou, i cili u dënua si përdorues droge, kokainë. Ai mori një dënim prej 4 vitesh me kusht, ndaj dhe u lirua.