Banda e tritolit, gjykata lë në burg 6 të arrestuar nga Pogradeci e Gramshi
Grupi po hetohet për disa ngjarje kriminale, u zbulua nga agjentët e infiltruar Iu gjetën 82 kallëpe eksploziv, armë dhe drogë
Gjykata e Shkallës së Parë e Elbasanit dje vendosi masën e sigurisë "Arrest me burg" për gjashtë anëtarët e bandës së tritolit, të cilët u arrestuan pasditen e së mërkurës gjatë operacionit të koduar "Porosia". Pas paraqitjes së provave materiale nga prokurori i çështjes, togat e zeza të këtij qyteti vendosën lënien në qeli të shtetasve Geraldo Yzeirllari, 20 vjeç, banues në Pogradec; Kristi Maxhari, 21 vjeç, banues në Pogradec; Kristian Petani, 22 vjeç, banues në Pogradec; Edmond Abazi, 39 vjeç, banues në fshatin Hudenisht, Pogradec; Gazmor Kokla, 39 vjeç, banues në fshatin Gribë, Gramsh dhe të 30vjeçarit Erges Lipo, banues në Pogradec. Sipas burimeve zyrtare nga policia e Elbasanit, këta persona janë pjesë e një grupi kriminal që merrej me shitjen e tritolit. Gjatë kontrollit të ushtruar në bane- sat e shtetasve në fjalë, policia gjeti dhe sekuestroi 82 kallëpe me tritol si dhe u sekuestrua kanabis, armë dhe 400 fishekë. Ndërkohë, mësohet se gjashtë të arrestuarit nuk kanë pranuar të bashkëpunojnë me drejtësinë. Po të njëjtat burime bënë me dije se anëtarët e grupit të tritolit që u arrestuan në Elbasan, Pogradec dhe Gramsh u zbuluan pas një hetimi njëmujor me metoda speciale ( falë një agjenti të infiltruar. Ky agjent kishte arritur të komunikonte me grupin dhe të kryente blerje tritoli me ta. Agjenti i infiltruar kishe kryer 4 porosi dhe kur u mor informacioni se grupi i tritolit po përgatiste një vrasje, atëherë u vendos të ndërhyhej. Policia dhe prokuroria po heton këtë grup për disa ngjarje kriminale në vend. Fakti që atyre që iu gjetën 82 kallëpe tritoli ngre dyshime se të arrestuarit kanë shitur mina me telekomandë në disa ngjarje kriminale në vend.