Vrasja e Devi Kasmit, apelohet masa e sigurisë për specialin grek, avokati: S'ka asnjë provë
TIRANË - Ekzekutori i dyshuar i Devi Kasmit mbrëmjen e 29 janarit të këtij viti kërkon lirinë në Gjykatën e Apelit të kryeqytetit. Dje avokati i specialit grek, Saimir Vishaj ka ankimuar masën e sigurisë "arrest me burg" ndaj Efthymiou Efthymious. Sipas Vishës, prokuroria nuk ka sjellë asnjë provë për klientin e tij dhe materialet e depozituara nga akuza nuk vërtetojnë se greku ka lidhje me vrasjen e 41vjeçarit Devi Kasmi. "Prokurori nuk solli asnjë provë për Efthymioun. Provat e depozituara nuk vërtetojnë se greku ka lidhje me vrasjen", tha Vishaj pas paraqitjes së kërkesës për ndryshim të masës së sigurisë. Devi Kasmi ( baba i dy fëmijëve) u vra në një atentat shumë pranë banesës në rrugën "Petro Çani". Në lidhje me vrasjen u arrestuan shtetasit Elton Halipaj, Efthymiou Efthymious, Malvin Dinellari, Elton Hoxhallari si dhe u shpall në kërkim shtetasi ( Altin) Aurel Hoxhallari. Gjithashtu, përfundoi në pranga dhe Mario Meshini i dyshuar se nxori në pritë Devi Kasmin. Për prokurorinë dhe policinë kjo është një ngjarje e zbardhur sa u përket autorëve. Por, motivi i saj vazhdon të jetë mister, pasi grupi hetimor nuk ka mundur të japë një version zyrtar. Por, sipas informacioneve policore, shkak i vrasjes dyshohet të jenë konfliktet e trafikut të lëndëve narkotike.
DEKLARATA
"Prokurori nuk solli asnjë provë për Efthimyoun. Provat e depozituara nuk vërtetojnë se greku ka lidhje me vrasjen", tha avokati Saimir Vishaj pas paraqitjes në gjykatë të kërkesës për ndryshim të masës së sigurisë ndaj klientit të tij.