Projektet me PPP, FMN ofron konsulencë për risqet
Zyrtari i lartë i FMN takon Ahmetajn: Të gatshëm t'ju mbështesim Vizita e Zhang, pritet në takim nga guvernatori i BSH, Sejko
Përfaqësuesi i Bordit drejtues të FMN viziton Tiranës. Zv. drejtori Ekzekutiv i fondi, Tao Zhang, u prit sot në një takim nga ministri i Financave dhe Ekonomisë Arben Ahmetaj. Edhe pse programi tre- vjeçar me FMN është përmbyllur, Ahmetaj i shprehu përfaqësuesit angazhimin e qeverisë shqiptare në vazhdimin e konsolidimit fiskal, uljen e borxhit publik dhe avancimin e reformave strukturore në ekonomi. "Ne jemi të bindur se pa vazhdim të reformave, nuk ka vazhdim të rritjes ekonomike për vendin. Ne kemi nisur një reformë të re në sektorin e ujit, ndërsa po vazhdojmë të thellojmë reformën në klimën e biznesit, tashmë më deregulimin dhe dixhitalizimin e shërbimeve për sipërmarrjen dhe qytetarët, duke iu kursyer atyre kohë dhe para, përmes lehtësimit të procedurave, gjë që kemi bindjen se do të reflektohet edhe në raportin Doing Business", u shpreh Ahmetaj. Programin e kaluar e vlerësoi si të suksesshëm edhe Zhang, i cili përgëzoi qeverinë për përmbushjen e objektivave kryesore. "FMN është e gatshme t'ju mbështesë në vazhdimësi, edhe përmes asistencës teknike si dhe për minimizimin e risqeve potenciale. Ne mbështesim vendet tona anëtare që të kuptojnë kapacitetet e tyre reale dhe të rriten në mënyrë të balancuar, në përputhje me këto kapacitete",tha zv. drejtori Ekzekutiv i FMN. Në takim u diskutua edhe mbi projektin "1 miliard" mbi të cilin qeveria ka vendosur të shpenzojë 1 miliard euro për projekte të infrastrukturës përmes partneritetit publik- privat. FMN është shprehur më parë se këto marrëveshje mund të rezultojnë të rrezikshme nëse nuk vendosen kapacitetet e duhura implementuese. Ministri Ahmetaj tha se qeveria shqiptare është e vetëdijshme për hapësirat fiskale dhe projektet e PPP janë parashikuar në planin buxhetor afatmesëm. Nga ana e tij, Zhang u shpreh se FMN është e gatshme të punojë me qeverinë shqiptare, në mbështetje të angazhimit të sektorit privat dhe kontrollin e risqeve potenciale.
TAKIMI ME SEJKON
Guvernatori i Bankës së Shqipërisë, Gent Sejko, priti dje në një takim zëvendës- drejtorin e Përgjithshëm të Fondit Monetar Ndërkombëtar, Tao Zhang. Gjatë takimit, Guvernatori u shpreh se sistemi financiar shqiptar karakterizohet nga tregues të qëndrueshëm. Ai u ndal te nxitja e kreditimit të shëndetshëm dhe reduktimi i kredive me probleme, raporti i të cilave në muajin dhjetor shënoi vlerën 13.2%. Më tej, Guvernatori Sejko prezantoi paketën e deeuroizimit, si një iniciativë me mjaft rëndësi, e cila, nëpërmjet masave konkrete për rritjen e përdorimit të monedhës kombëtare, do të mundësojë rritjen e efektivitetit të politikës monetare dhe forcimin e stabilitetit financiar. Nga ana e tij, zëvendësdrejtori i Përgjithshëm i FMN- së Tao Zhang, vlerësoi Bankën e Shqipërisë për politikat e ndërmarra prej saj, të cilat kanë kontribuar në ruajtjen e stabilitetit makroekonomik dhe konsolidimin e sistemit financiar. Duke u ndalur në aktivitetin ekonomik, ai theksoi se ruajtja e ritmit të reformave dhe forcimi i mirëqeverisjes kanë rëndësi të veçantë për të përmirësuar klimën e biznesit dhe për të thithur sa më shumë investime të huaja në Shqipëri. Zëvendësdrejtori i FMN u prit në një takim edhe nga Ministri i Financave dhe Ekonomisë, Arben Ahmetaj.