Marku te Krimet e Rënda: Përshpejtoni hetimet, të arrihen rezultate konkrete
"Pavarësia e prokurorëve mbetet e pacenuar"
Kryeprokurorja
Arta Marku bëri dje analizën e punës në Prokurorinë e Krimeve të Rënda. Ajo iu ka kërkuar prokurorëve të çojnë përpara hetimet dhe të arrijnë rezultate konkrete, duke shtuar se kjo kërkon energji të reja. "Prokuroria e Përgjithshme nxit dhe mbështet përshpejtimin e hetimeve të të gjitha çështjeve nga prokurorët e Krimeve të Rënda. Kjo, pa e cenuar aspak cilësinë e hetimeve, por për shkak të ndjeshmërisë së lartë publike që kanë çështjet që hetohen prej jush. Prandaj, kërkohet kjo shpejtësi në plotësimin dhe standardizimin e protokolleve hetimorë. Pavarësia e prokurorëve mbetet e pacenuar, si një e drejtë e njohur nga Kushtetu- ta dhe Kodi i Procedurës Penale. Por, kjo nuk do të thotë që të kalohet në anarki, përveçse kërkohet vëmendje dhe përkushtim maksimal në ushtrimin e ndjekjes penale dhe përfaqësimin e akuzës në gjykatë si dhe zbatimin rigoroz të rregullave procedurale dhe rregullave të parashikuar në ligjin për organizimin e prokurorisë",- u shpreh Marku. Gjithashtu, kryeprokurorja dha udhëzimet e veta në lidhje me pavarësinë e prokurorëve duke bëri thirrje të mos kalohet në anarki. "Për vetë specifikën e veprave penale që janë objekt i ndjekjes penale nga Prokuroria për Krime të Rënda, ku shpesh ndërthuren organizatat apo grupet kriminale transnacionalë, kërkohen energji të reja për të ngritur më shumë nivelin e bashkëpunimit dhe bashkërendimit të punës me agjencitë e zbatimit të ligjit brenda vendit dhe veçanërisht me partnerët ndërkombëtarë",- tha Arta Marku.