"Deti", Shehu: Çështjen ta zgjidhim në Gjykatën Ndërkombëtare të Drejtësisë

Deputeti

i PD- së, njëherazi nënkryetari i Komisionit të Jashtëm, Tritan Shehu kritikoi dje palën shqiptare për negociatat me Greqinë, të cilat sipas tij janë mbyllur fshehurazi. Pas takimit me presidentin Meta, Shehu e konsideroi absurd nisjen e diskutimeve teknike, në një kohë që palët kanë rënë dakord politikisht. Pas takimit me presidentin Meta, Tritan Shehu, tha se gjithçka është bërë në mungesë transparence, duke iu referuar edhe deklaratave të ministrit të Jashtëm grek, i cili flet për një marrëveshje të përfunduar. "Negociatat deri tani janë nisur në mënyrë aspak transparente, aspak të qartë dhe pa plotfuqishmëri, dhe i kërkohet tani ditët e fundit. Jemi në një situatë ku mungon transparenca dhe ministri grek i Jashtëm thotë se marrëveshja është arritur, por pa plotfuqishmëri të presidentit tonë pa asnjë hap legal dhe asnjë nuk di mbi çfarë baze do ishte kjo marrëveshje",tha z. Shehu. Ai shtoi se do të ishte e udhës që Greqia dhe Shqipëria t'i drejtohen Gjykatës Ndërkombëtare, teksa vlerësoi marrëveshjen e 2009 të bërë nga qeveria Berisha. "Ne gjykojmë dhe unë gjykoj që mënyra më racionale për të shtyrë përpara këtë proces, për të hequr të gjithë tymnajat për të qenë sa më i drejtë ky proces është që kjo marrëveshje, ose ky delimitim i kufijve detarë me Greqinë të zgjidhet nga Gjykata Ndërkombëtare e Drejtësisë. Të dy vendet me mirëkuptim t'i drejtohen dhe pastaj në mirëkuptim të dy vendet të pranojnë verdiktin e tyre dhe konkluzionet e tyre. Unë gjykoj se ky do të ishte zgjidhja më e mirë për këtë problem artificial të krijuar nga kjo qeveri qoftë kundër marrëveshjes së 2009 që ishte një marrëveshje e mirë, qoftë për këtë mënyrë të shtrembër, jo transparente me të cilën është kjo periudhë deri më sot në negociatat me Greqinë për marrëveshjen e re",- tha deputeti i PD- së.