Firmosja e marrëveshjes për detin, Tsipras- Rama për Pashkë në Korçë
Pakti detar, kryeministri grek autorizon negociatat finale me Shqipërinë Burimet: Pala shqiptare, dakord me heqjen e termit "Çamëri"
Kryeministri Aleksis Tsipras ka autori zuar fazën finale të negociatave për "shportën" e çështjeve të pazgjidhura mes Greqisë dhe Shqipërisë. Burime diplomatike pranë Ministrisë së Jashtme greke i kanë konfirmuar "Top Channel" se tri ditë më parë, Tsipras ka dhënë dakordësinë dhe fuqinë ekzekutive për ministrin e Jashtëm dhe ekipin negociator grek, për të kaluar në fazën e shkrimit të marrëveshjeve mes dy vendeve. Në Kretë dhe Korçë, por edhe gjatë takimit të fundit që dy ministrat e Jashtëm kishin në Bullgari, janë detajuar edhe ato pak pika që palët nuk kishin një pozicion përfundimtar. "Top Channel" ka mësuar se tashmë konsiderohen të mbyllura marrëveshja e detit, ku palët kanë detajuar çdo pikë të saj, madje kanë dakordësuar edhe në hartë për ndarjen e re të vijës bregdetare dhe të zonës ekskluzive ekonomike. Po ashtu, ka përfunduar deri në detaje, madje pritet implementimi ndoshta brenda muajit mars ose prill, heqja e vulës apostile për legalizimet e dokumenteve zyrtare shqiptare. Implementimi i kësaj marrëveshjeje do të kursejë mijëra euro nga xhepat e emigrantëve shqiptarë, të cilët humbin ditë të tëra në radhë për të legalizuar certifikata dhe dokumente zyrtare. Ka përfunduar marrëveshja për heqjen e ligjit të luftës, ajo e përcaktimit në terren dhe mirëmbajtjen e piramidave të kufirit tokësor, marrëveshja e menaxhimit të krizave mes dy vendeve, çështjet e patentave, ajo e varrezave të të rënëve grekë në Luftën e Dytë Botërore, si dhe disa marrëveshje bashkëpunimi rajonal, çështja e pronave të komunitetit ortodoks, apo zgjerimi i detyrimeve për zonat minoritare, për të cilat burimet i thanë "Top Channel" se pala shqiptare është zotuar të zgjerojë si zonat minoritare, por edhe mënyrën e përcaktimin e statusit të zonës minoritare. Burimet diplomatike në Athinë tregojnë se Tirana është zotuar të përmbushë të gjitha detyrimet që përmban konventa e mbrojtjes së minoriteteve, madje edhe t'i zgjerojë ato, përsa u përket programeve integruese të minoriteteve, kuotave të punësimit në administratë, por edhe me përfaqësimin e tyre politik, si në nivel lokal, edhe me atë qendror. Ndërsa detajet e fundit po konkretizohen në marrëveshjen e korrigjimit të teksteve shkollore, për të cilën palët kanë dakordësuar heqjen e termave irre-
dentiste apo fyese për dy vendet. Burimet thonë se palët kanë rënë dakord për shmangien e termave gjeografike, të cilat përcaktojnë zona si "Voriepiri" për grekët apo "Çamëria" për palën tonë, për të cilat është rënë dakord që të mos përdoren në nivelet e larta të politikës. Burimet në Athinë shprehen se pala shqiptare është zotuar për heqjen e termit "Çamëri" nga regjistri i gjendjes civile, kur bëhet fjalë për personat e lindur në fshatrat e zonës së Thesprotisë. Diplomatët e lartë grekë i thanë "Top Channel" se kjo çështje do të bisedohet në takimin privat familjar mes Tsipras dhe
Ramës në Korçë, pak ditë përpara atij zyrtar, që do të mbahet në Tiranë. "Top Channel" mësoi se kryeministri Tsipras ka pranuar ftesën e homologut të tij, Rama për të kaluar së bashku me familjet e tyre, por edhe nën shoqërinë e ministrave Bushati dhe Kotzias, Pashkët Ortodokse, në datën 6- 8 prill, ndërsa mbetet ende e pakonfirmuar data e vizitës zyrtare të kryeministrit grek në Tiranë, ku më e mundshme është përcaktimi i saj në 1012 prill ose diku rreth fundit të prillit, nëse do të vendoset për firmosje të të gjithë marrëveshjeve të dakorduara.