Ushtarakët në test për të shkuar në misione, Xhaçka: Vlerësim sipas meritës
Ministrja e Mbrojtjes takon efektivët e këmbësorisë në Poshnje "Me rëndësi që ky të jetë një proces transparent"
Ministrja e Mbrojtjes, Olta Xhaçka u tha efektivëve të batalionit të tretë të këmbësorisë në Poshnje të Beratit se ushtarakët që do të marrin pjesë në misionet jashtë vendit, do të kalojnë në testim. Në vizitën e saj, gjatë dy ditëve të qëndrimit për mbledhjen e qeverisë në Berat, ministrja Xhaçka shoqërohej nga zëvendësministri Petro Koçi dhe komandanti i Forcës Tokësore gjeneral brigade Nazmi Cahani. Fillimisht ministrja Xhaçka falënderoi të gjithë efektivët e këtij batalioni për angazhimin dhe kontributin e tyre në përmbytjet e fundit, sidomos tani që Emergjencat Civile janë nën përgjegjësinë e institucionit që ajo drejton. "Dua të ndalem pak tek Emergjencat Civile që tashmë janë fushë përgjegjësie e Ministrisë së Mbrojtjes, sepse e kam parë kontributin, dedikimin, përkushtimin, profesionalizmin e gjithsecilit prej jush në ato operacione shumë të vështira në fillim të dhjetorit, kryesisht në zonën e Fierit dhe të Vlorës, por edhe këtu në Berat me punën e jashtëzakonshme që ka bërë gjithsecili prej jush për t'i ardhur në ndihmë atyre banorëve që vuanin pasojat e motit të keq"- tha ministrja Xhaçka, e cila u shpreh se ishte në dijeni të vështirësive dhe nevojave të ushtarakëve dhe për të cilat shprehu angazhimin e saj për një trajtim më dinjitoz për secilin prej tyre. Më tej ministrja Xhaçka zhvilloi një bisedë të shkurtër edhe me ushtarakët që kanë kaluar me sukses testet për t'u bërë pjesë e kontingjentit të ardhshëm shqiptar, i cili do të shërbejë në misionin e NATO- s Resolute Support në Kabul të Afganistanit, në kuadër të rritjes së kontributit të vendit tonë dhe shtimit të trupave shqiptarë në këtë mision. Ministrja i siguroi ata për një proces përzgjedhës të rregullt, i bazuar tërësisht në meritë dhe për të cilin mori konfirmimin e tyre. "Është shumë e rëndësishme që ky të jetë një proces, i cili vlerëson më të mirët, që vlerëson meritokracinë dhe vlerëson ata njerëz që vërtetë janë të përgatitur për të shkuar në misione paqeruajtëse sepse sigurisht ju të gjithë e kuptoni që është një përgjegjësi jas-