Basha i kërkon Hahn: Ndiko për një rekomandim pozitiv nga Komisioni

Kryetari

i PD- së, Lulzim Basha i shprehu dje komision erit për Zgjerimin, Johannes Hahn mbështetjen e opozitës për një rekomandim pozitiv për çeljen e negociatave të Shqipërisë me BE- në. Gjatë një takimi të zhvilluar dje me Hahn në Tiranë, Basha e garantoi komisionerin se pavarësisht problemeve me keqqeverisjen, shqiptarët meritojnë hapjen e negociatave. Në njoftimin e shpërndarë nga zyra e shtypit të PD thuhet se, "kreu i opozitës e nxiti komisionerin për të ndikuar për një rekomandim pozitiv nga Komisioni". I bindur se hapja e negociatave do të forcojë demokracinë, Lulzim Basha kishte një kërkesë për komisionerin për Zgjerimin, Johannes Hahn. "Pavarësisht problemeve të keqqeverisjes në vend, shqiptarët aspirojnë për të qenë pjesë e Bashkimit Europian dhe kanë përqafuar vlerat e Bashkimit Europian. Hapja e negociatave do të ofrojë një mekanizëm të fortë dhe të pavarur për monitorimin e nivelit të demokracisë, respektimit të të drejtave të njeriut dhe të cilësisë së qeverisjes në Shqipëri", - mësohet të ketë thënë Basha. Basha siguroi komisionerin Hahn për vazhdimin e angazhimit pa kompromis të opozitës për luftën kundër krimit dhe korrupsionit, të zbatimit në mënyrë kushtetuese dhe të paanshme të reformës në drejtësi, si dhe plotësimin e kritereve të tjera për hapjen e negociatave të anëtarësimit. Në takimin me komisionerin Hahn, kryetari i Partisë Demokratike theksoi se opozita është e vetëdijshme se vendet anëtare të Bashkimit Europian kërkojnë prova dhe rezultate konkrete dhe se Partia Demokratike do të luajë rol të rëndësishëm për arritjen e tyre.