Shkatërrohet rrjeti i trafikut të drogës, ndalohen dhe arrestohen 15 persona
Superoperacioni është shtrirë në Gjirokastër e Durrës, priten arrestime të tjera Pjesëtarët e grupit kriminal janë kryesisht nga Bashkia e Konispolit, disa me precedentë penalë
Një operacion i gjerë antidrogë ka nisur që prej mbrëmjes të së hënës në Sarandë, ndërsa është shtrirë ditën e djeshme edhe në Gjirokastër e Durrës. Burime nga policia e qytetit bregdetar dje bënë me dije për "Gazeta Shqiptare" se është zbuluar dhe shkatërruar një grup kriminal që trafikonte lëndë narkotike nga Shqipëria në Greqi. Mësohet se gjatë këtij operacioni është sekuestruar një sasi e konsiderueshme droge, ndërsa janë ndaluar dhe arrestuar 15 persona, të cilët janë kryesisht banorë të Bashkisë së Konispolit. Po të njëjtat burime thanë se disa nga shtetasit e ndaluar dhe të arrestuar janë me precedentë penalë. Ndërkaq, pritet që të përfundojnë në pranga edhe persona të tjerë ( të paktën tre), të cilët dyshohen se janë përfshirë në trafikun e kanabisit me destinacion vendin fqinj.
OPERACIONI ANTIDROGË
Pas hetimeve me metoda speciale, policia e Sarandës në bashkëpunim me forcat operacionale në Drejtorinë e Përgjithshme të Policisë së Shtetit, rreth orës 20: 00 të së hënës kanë ndërmarrë një superoperacion antidrogë. Paraprakisht bëhen me dije inicialet e katër prej personave të arrestuar. Kjo për shkak të ruajtjes së sekretit hetimor, pasi operacioni vijon. Bëhet fjalë për shtetasit A. L., banues në fshatin Shalës të Sarandë i dënuar më parë për "prodhim dhe shitje të lëndëve narkotike" dhe i arrestuar më parë për "dhënie ndihme për kalim të paligjshëm të kufirit"; F. D., banues në Konispol; A. H., banues në fshatin Shalës si dhe A. S., banues në fshatin Vrinë. Ndërkaq, burimet e mësipërme pohuan se gjatë operacionit, grupit të trafikantëve i janë sekuestruar gjashtë automjete të markave "Mercedes- Benz", "Wolsvagen", "Renault" dhe "Fiat". Sipas bluve, grupi kriminal kryente trafik droge nga kufiri i gjelbër tokësor i Sarandës drejt Igumenicës e më pas lënda narkotike dërgohej në Athinë. Mësohet se ky grup ka trafikuar disa herë kanabis në vendin fqinj. Operacioni i ndërmarrë nga policia shqiptare është bazuar edhe në informacionet e siguruara nga autoritetet