Marrëveshja me Greqinë, Meta: Të jetë e blinduar nga ana kushtetuese
"Plotfuqishmëria", presidenti i kërkon Bushatit informacione shtesë “Problem nuk janë arrestimet, por mosarrestimet”
"Shqetësim nuk janë arrestimet, por që çdo gjë të bëhet në bazë të provave, pa paragjykime, të jenë procese që do shikohen e monitorohen. Të rritet besimi te gjykatat. Ka drejtues për të cilët ka fletë arresti, por nuk arrestohen", - tha dje Presidenti Meta.
PRESIDENT TË PËRBASHKËT
Në lidhje me deklaratën e bërë nga kryeministri për një president të përbashkët Shqipëri- Kosovë, Meta nuk komentoi, por tha se bashkëpunimi dhe unifikimi duhet të nisë nga gjërat më e të vogla për të arritur deri në këtë pikë.
DEKLARATA
"Unë do të përmbush të gjitha detyrimet kushtetuese. Pra, që të jetë sa më i blinduar nga ana kushtetuese dhe pikat e saj janë të detyrueshme. Unë mendoj se kjo duhet të jetë një marrëveshje e drejtë për të dyja vendet", - tha dje Meta.
Presidenti Ilir Meta po hoi dje se i ka kërkuar të tjera informacione shtesë ministrit të Jashtëm, Ditmir Bushati për sa i përket objektit të negocimit me palën greke. Gjatë intervistës në "Studio e Hapur", në "News 24", Meta foli edhe për Artur Meçollarin, një prej negociatorëve, për të cilin pati mjaft akuza. "Elementin më pozitiv për personin konkret vlerësoj letrën që kam lexuar dje apo pardje, që ia kishte dërguar zotit Llalla, ku protestonte për mbylljen e çështjes penale të ekipit negociator të vitit 2009, duke dhënë argumente dhe fakte, një pjesë e të cilave ishin interesante që ngarkonin negociatorët. Sipas tij, prokuroria e kishte mbyllur në mënyrë jo të drejtë. Nuk mund të bëj gjykatësin, por ka treguar se ka ndjeshmëri, përgjegjshmëri ndaj interesave të shtetit", - tha ai.
A do japë presidenti "plotfuqishmërinë" e tij për negociatat?
Kjo çështje ka marrë shumë vëmendje. Presidenti duhet të bëjë gjithçka për të përmbushur detyrimet e tij kushtetuese dhe institucionale për mbarëvajtjen e kësaj marrëveshjeje që synohet dhe të marrëdhënieve me Greqinë.
A është e vërtetë që e keni kthyer procesin sërish në Ministrinë e Jashtme për më shumë informacion?
Nuk ka pasur në asnjë rast kthim apo refuzim për dhënie autorizimi të tillë, por ka pasur deri në pikën e plotë dhe përfundimtare sipas të gjitha standardeve që përcakton vendimi i Gjykatës Kushtetuese, një procedure e cila duhet të jetë sa më e saktë. Edhe për një arsye tjetër, është se çështja më e debatuar në ditët e fundit për shkak të asaj që ndodhi në vitin 2009 dhe vendimin e Kushtetueses në 2010 që e rrëzoi atë marrëveshje. Për këtë çështje, ky vendim i Gjykatës Kushtetuese është vetë Kushtetuta, prevalon mbi çdo ligj dhe akt tjetër. Do të mjaftonte një mosrespektim i dokumenteve kushtetuese, në mënyrë që nesër, një grupim të bëjë të njëjtën gjë, të ankohet në Gjykatën Kushtetuese, për ta shpallur marrëveshjen e re antikushtetuese.
Pra, keni kërkuar informacione të tjera përveç informacioneve të para?
Po, kemi kërkuar informacione. Jo vetëm që është detyra ime të respektoj Kushtetutën dhe vendimin e Gjykatës Kushtetuese, por së dyti duhet të kemi parasysh se edhe një element formal i kësaj gjykate që është vetëm për marrëveshjen me Greqinë, do të mjaftonte që edhe sikur të ishte një përmbajtje shumë e mirë, me kërkesën e një grupimi në Kushtetuese, kjo marrëveshje e re do të kërkohej të rrëzohej. Është me rëndësi që të ecet vetëm në shina kushtetuese, pasi vetëm një proces që përmbyllet me sukses u intereson të dyja vendeve.
Si i komentoni deklaratat për njërin nga negociatorët, Artur Meçollarin?
Lidhur me negociatorët, unë vlerësoj që integriteti i tyre dhe njohuritë e tyre janë mjaft të rëndësishme. Kjo, pasi dhe Gjykata Kushtetuese ka folur për metodologji, të e rrisin shumë rolin e negociatorëve për këtë marrëveshje. Unë nuk kam asnjë arsye, unë si president jam i detyruar që të kërkoj informacion të detajuar. Nuk kam ndonjë informacion konkret vetëm të atyre qëndrime që kemi dëgjuar në media. Elementi pozitiv për personin konkret është një letër që i kishte dërguar ishprokurorit, ku ai protestonte për mbylljen e çështjes penale për grupin e vitit 2009, të cilat i ngarkonin me përgjegjësi penale dhe ligjore. Në këtë aspekt, nuk mund të them dhe të bëj gjykatësin që ka të drejtë apo jo. Kjo tregon se ka një ndershmëri dhe integritetin që kanë këta negociatorë. Ne kemi kërkuar për të gjithë emrat informacione, për disa edhe më shumë, por nuk mund të flas më tepër pa marrë informacione zyrtare. Për faktin se ka qenë në takimet e mëparshme me ministrin e Jashtëm, nëse ka qenë për negociatat kjo është shkelje e rëndë, por nuk e besoj këtë gjë. Për deklarata e Berishës dhe për ato që flitet duhet të presim të verifikohen.
Pretendimet e opozitës për figurën e disa negociatorëve, a e kanë vënë Ilir Metën midis dy zjarreve?
Absolutisht jo. Dikush mund të mendojë se jam në një situatë të vështirë, por unë jam në një situatë komode. Vendimi i Gjykatës Kushtetuese e cilëson qartë se si duhet të veprojë presidenti dhe institucionet përkatëse. Në këtë pikë jam komod. Opozita kërkon që kjo çështje të shkojë në gjykatë ndërkombëtare, në mënyrë që të bëhet çështja më e drejtë. Mazhoranca kërkon që të arrihet një marrëveshje e re. Unë e vlerësoj angazhimin e mazhorancës. Me rëndësi është që të zbatohet vendimi i Kushtetueses. A do e miratoni listën? Nuk kam paragjykim ndaj listës. Edhe autorizimi, edhe ' plotfuqishmëria' janë elementë besimi. Unë mendoj se do të kemi listën më të mirë. Pavarësisht se të gjithë ndikohemi nga opinionet që dëgjojmë, unë do të veproj në mënyrë institucionale.
Si i shihni bisedimet mes dy ministrave të Jashtëm të Shqipërisë dhe Greqisë?
E vlerësoj angazhimin për bisedimet mes dy ministrave.
' Plotfuqishmëri' apo autorizim, çfarë lëshon presidenti?
Nuk ka rëndësi, mbi çdo gjë tjetër prevalon vendimi i Gjykatës Kushtetuese.
Keni pasur konsulta me ish- presidentët për këtë çështje, pse i thirrët?
Po, gjithmonë konsultimet janë në të mirë të vendimit që do merret në fund.
Zoti Meta, po flisnim për ' plotfuqishmërinë' dhe pyetja ime është kjo: Çfarë duhet të bëjë qeveria që ju të jepni "plotfuqishmërinë"?
Të vazhdojmë këtë bashkëpunim që të ecim në shina kushtetuese, sepse ky është interes i përbashkët.
Kryeministri Tsipras ka parashikuar vizitë në Korçë? Mund të nënshkruhet marrëveshja para vizitës së tij?
Nuk komentoj deklarata zyrtare dhe jozyrtare dhe e drejtë për të dyja vendet është që të firmoset që sot, por çdo gjë duhet të bëhet në mënyrën më të pjekur dhe të mos jemi në një situatë të padëshirueshme për të gjithë.
Pse insistoni kaq shumë për pikat që parashikon GJK?
Unë dua që këtë proces ta blindoj nga ana kushtetuese.
Do e firmosni marrëveshjen me Greqinë nëse humbasim territor?
Unë do të përmbush të gjitha detyrimet kushtetuese. Pra, që të jetë sa më i blinduar nga ana kushtetuese dhe pikat e saj janë të detyrueshme. Unë mendoj se kjo duhet të jetë një marrëveshje e drejtë për të dyja vendet.
Zoti president, ju keni folur për mungesë transparence për negociatat, por e keni takuar 3 herë ministrin e Jashtëm, Ditmir Bushatin, besoj për këtë keni folur… Pse pretendoni që s'ka pasur transparencë?
Ju s'keni pse gjykoni qëndrimet e mia… Bushatin e kam takuar as 20 minuta, para se të shkonte në Korçë, i është i uruar suksese për çështjet që do bisedojë. Ia kam bërë të qartë se në marrëdhëniet me Greqinë do i jepja prioritet komunikimit zyrtar. Kemi me ta disa çështje që kërkojnë komunikim të përgjegjshëm dhe do vazhdoj ta kërkoj edhe në të ardhmen. Shpresoj që të gjitha çështjet të zgjidhen dhe secili institucion të përmbushë përgjegjësitë e tij.
Prej Arta Markut pritet kapja e "peshqve të mëdhenj", janë kapur disa drejtorë rrugësh, a mendoni se janë ata disa prej "peshqve të mëdhenj"?
S'mund t'ia lejoj vetes të hyj në gjëra politike. Shqetësim nuk janë arrestimet, por që çdo gjë të bëhet në bazë të provave, pa paragjykime, të jenë procese që do shikohen e monitorohen. Të rritet besimi tek gjykatat… Ka drejtues për të cilët ka fletë arresti, por nuk arrestohen. Problem tjetër madhor është krimi i organizuar, ' shqiptarët po ia kalojë edhe mafies atje' - tha prokurori italian i Antimafias një ditë më parë.
A keni besim tek Arta Marku?
Më bëre një pyetje të vështirë, unë kam dhe s'kam besim tek asnjeri. Çdo njeri është produkt i një ambienti, rrethanave, unë besoj tek sistemi. Ky do jetë ai standardi që i duhet Shqipërisë. Prokurorja është në provën e saj, kam pasur zhgënjimet e mia edhe nga njerëz tek të cilët kam besuar.
Keni ndonjë koment për faktin se Llalla është shpallur "non grata" nga SHBA?
Nuk kam asnjë arsye që të bëj komente për vendimet që marrin SHBA- të, pasi është e drejtë e tyre që të marrin këtë vendim, jo vetëm për Llallën, por për këdo. Unë s'kam pasur informacione për raste korrupsioni apo shkelje ligji kur kam qenë kreu i Kuvendit. Kam pasur dijeni vetëm për heqjen e vizave të tij, për shkak të lindjes së bashkëshortes së tij në SHBA.
Ish- kryeprokurori thotë se Lu ka dërguar informacione të rreme në DASH?
Nuk merrem unë me këtë çështje, por mendoj se SHBAtë janë shtet serioz dhe në çdo rast marrin vendimet e duhura dhe dinë të pozicionohen si duhet. Ne kemi pasur vetëm një rast kur është hedhur shorti për KED, kur Prokuroria e Përgjithshme kishte detyrën e saj për propozimet dhe ka pasur një shqetësim nga ndërkombëtarët se mos prokuroria ka shkelur ligjin për kandidatët. Pasi janë hetuar dhe verifikuar këto pretendime, ka rezultuar se prokuroria ka vepruar në mënyrë korrekte kërkesat. Nuk kam asnjë dijeni dhe asnjë informacion tjetër për këto lloj raportesh.