Kryeprokurori i Antimafias italiane: Kokaina u kap nga policia shqiptare
Sekuestrimi
i sasisë rekord të kokainës ka pasur edhe me reagimin e prokurorit të Antimafias italiane. Në një reagim zyrtar, Federico Cafiero De Raho përgëzon prokurorinë dhe policinë shqiptare për operacionin. De Raho thekson se ky operacion u realizua nga policia shqiptare, pa asnjë ndihmë nga ana e autoriteteve gjyqësore italiane. "Ky operacion merr më shumë rëndësi falë faktit se u realizua nga policia shqiptare, pa asnjë ndihmë nga ana e autoriteteve gjyqësore italiane. Suksesi i arritur sot në luftën kundër trafikut të lëndëve narkotike me sekuestrimin e 613 kilogramëve kokainë është një ndër rezultatet e para të strategjisë kundër krimit të organizuar dhe korrupsionit, të cilën qeveria shqiptare po e zbaton fuqimisht, siç munda të mësoj dhe gjatë vizitës sime të fundit në Shqipëri, të realizuar me ftesë të Ministrit të Brendshëm. Siç dhe konstatova duke vizituar selinë e Task Forcës dhe siç pata mundësi t'ua deklaroj qartësisht dhe organeve të medias, nga takimet me ministrin e Brendshëm, ministrin e Drejtësisë, Prokurorin e Përgjithshëm të Shqipërisë dhe drejtuesin e Prokurorisë për Krimet e Rënda, u shfaq vullneti dhe angazhimi i qeverisë dhe prokurorisë për të vënë në jetë të gjitha masat e nevojshme për të penguar infiltrimin e krimit të organizuar në Institucionet shqiptare. Prokuroria Kombëtare e Antimafias dhe Antiterrorizmit do të ofrojë, sikundër dhe në të kaluarën, çdo lloj mbështetje për institucionet gjyqësore dhe për Policinë shqiptare, për të luftuar sa më mirë krimin e organizuar transnacional", shprehet ndër të tjera, Federico Cafiero De Raho.