Kokaina në Durrës, Xhafaj: Çoni hetimet deri në fund
Policia: Akuzat e Bashës, absurde
TIRANË - Pas sekuestrimit të sasisë rekord të kokainës në portin e Durrësit, ka reaguar ministri i Brendshëm, Fatmir Xhafaj. Përmes një postimi në "Twitter", ai shkruan se droga u kap falë një superaksioni të Policisë së Shtetit në bashkëpunim me agjencitë e huaja. "Një superaksion i Policisë së Shtetit në bashkëpunim me agjencitë e tjera ligjzbatuese vendëse dhe të huaja. Goditje e fortë trafikut ndërkombëtar të drogës! Hetimi vazhdon! Forca e ligjit, forca e shtetit po vepron. Pas pak, detajet nga Policia e Shtetit në një konferencë për shtyp", shkruante Xhafaj. Po dje, Xhafaj zhvilloi një takim me drejtorin e Përgjithshëm të Policisë së Shtetit, Ardi Veliu, ku përgëzoi policinë dhe inkurajoi për një hetim gjithëpërfshirës. Ai vlerësoi faktin e ruajtjes së konfidencialitetit të operacionit nga policia dhe Hetimi Doganor. Fatmir Xhafaj kërkoi bashkëpunim të ngushtë me prokurorinë për t'i shkuar deri në fund hetimit. Ndërkaq, Policia e Shtetit ka reaguar pas akuzave të kreut të PD- së, Lulzim Basha, i cili deklaroi se droga nuk mund të kalonte nga Shqipëria pa garanci politike, duke iu dhënë meritën shërbimeve të huaja dhe partnerëve ndërkombëtarë. Nga ana tjetër, Policia e Shtetit shprehu keqardhjen për sulmin e pakuptimtë të kreut të PD- së. "Operacioni është kryer në bashkëpunim me Hetimin Doganor, që në bazë të analizës së riskut ka sinjalizuar Policinë e Shtetit për një dyshim të arsyeshëm lidhur me mjetin që transportonte drogën e ardhur nga Kolumbia, përmes Italisë e Maltës. Ky operacion është një sukses i padiskutueshëm i agjencive ligjzbatuese shqiptare, që është finalizuar falë bashkëpunimit intensiv me Hetimin Doganor dhe Prokurorinë e Krimeve të Rënda", deklaroi Policia e Shtetit.