Vendimi: Praktikë për 1500 praktikantë të arsimit parauniversitar
Plot
1500 praktikantë të arsimit paraun iversitar në vend do të kryejnë praktikën profesionale me kontratë të përkohshme brenda vitit 2018- të. Ky vendim është miratuar ditën e djeshme gjatë mbledhjes së Këshillit të Ministrave me propozimin e Ministrisë së Arsimit, Sportit e Rinisë. Kjo praktikë profesionale do të zhvillohet në periudhën 1 janar deri në 15 qershor 2018- të si dhe nga 15 shtatori deri në 31 dhjetor po të këtij viti. Praktikantët gjatë periudhës së kryerjes së praktikës profesionale do të përfitojnë çdo muaj nga punëdhënësi, në këtë rast njësitë arsimore vendore, pagesën e kontributeve të sigurimeve shoqërore dhe shëndetësore në masën 27.9%. "Njësitë arsimore vendore ( drejtoritë arsimore rajonale dhe zyrat arsimore), gjatë periudhës për kryerjen e praktikës profesionale, realizojnë çdo muaj pagesën e kontributeve të sigurimeve shoqërore dhe shëndetësore, në emër të punëdhënësit në masën 16.7% si dhe në emër të punëmarrësit në masën 11.2%, të përllogaritur.",- theksohet në vendimin e Këshillit të Ministrave. Ndërkaq, masa mujore e kontributeve të sigurimeve shoqërore dhe shëndetësore do të përllogaritet mbi pagën minimale mujore 24 mijë lekë. Ndryshimet në vendimet përkatëse të Këshillit të Ministrave për përcaktimin e pagës minimale në shkallë vendi reflektohen menjëherë në masën e pagesës që punëdhënësi paguan çdo muaj për kontributet e sigurimeve shoqërore dhe shëndetësore. "Efektet financiare për pagesën e kontributeve të sigurimeve shoqërore dhe shëndetësore për vitin 2018, të përllogaritur në emër të punëdhënësit dhe të punëmarrësit, në shumën 90 396 000 ( nëntëdhjetë milionë e treqind e nëntëdhjetë e gjashtë mijë) lekë, që rrjedhin nga zbatimi i këtij vendimi, të mbulohen nga fondet e miratuara në buxhetin e vitit 2018, për Ministrinë e Arsimit, Sportit dhe Rinisë", - citohet në vendim.