Vendoret 2019, Kryemadhi: Mund të kemi kandidatë të përbashkët me PD
Kryetarja e LSI: Nipërit do thonë "t'u thaftë dora që nuk i re Ramës" "Akuzat për lobin rus ndaj Bashës, qesharake"
Kryetarja e LSI- së, Monika Kryemadhi cilësoi si betejën më të madhe të partisë që drejton luftën ndaj varfërisë. Gjatë një bashkëbisedimi me gazetarët, Kryemadhi tha: "LSI propozon të rikthehet edhe njëherë në parlament ligji për taksat, sepse kjo nuk është më një çështje egoje personale e Edi Ramës dhe asnjë fjalë e dhënë ndaj oligarkëve shqiptarë, por është çështja e mbijetesës së qindra dhe mijëra bizneseve shqiptare, që taksat e larta jo vetëm i varfërojnë, por i çojnë drejt shpërbërjes". Sipas saj, vetëm në 2 muaj 2500 biznes kanë bërë kërkesë për t'u mbyllur. Nuk munguan në deklaratën e Kryemadhit as batutat me "çizmen". "Raporti i BERZH na paralajmëron që pas 60 viteve ne do të kemi shansin të kemi ritme mesatare me BE. Pra, kur unë të jem 104 vjeçe, ne do të jemi pothuajse si europianët dhe jam e bindur që stërnipërit e mi do më thonë t'u thaftë dora që ajo çizmja jote nuk i ra në kokë Edi Ramës që ta shkundte pak nga trutë dhe të bënte diçka të mirë për këtë vend. Dhe breza të tërë gjatë këtyre 60 viteve do të largohen nga Shqipëria dhe nuk do ta kthejnë më kokën pas duke parë ritmet me të cilat po zhvillohet ky vend", tha ajo. "Opozita dhe kryesisht LSI ia kanë krijuar qeverisë të gjitha kushtet me një komoditet të jashtëzakonshëm për negociatat, sepse mendojmë që negociatat janë shumë më të rëndësishme se axhenda politike e partive politike", u shpreh Kryemadhi, e cila tha se i kishte dërguar një letër komisionerit të Zgjerimit, Johannes Hahn, ku shpreh mbështetjen e LSI- së për hapjen e negociatave.
BASHKËPUNIMI ME PS
Duke komentuar mungesën e saj në media, Kryemadhi tha: "Më mirë të keni mall për mua sesa të kenë mall socialistët që të kërcasë ndonjë çizme tjetër, se me situatën që ka ardhur vetëm çizmet që nuk dalin". Kryemadhi la të kuptohet se bashkëpunim me PS- në do të ketë në interes të qytetarëve të vendit. "Marrëdhëniet e mia qoftë me Z. Basha, edhe me z. Rama personale janë marrëdhënie shumë të mira. Me z. Basha aktualisht jemi në marrëdhënie bashkëpunimi përsa i përket frontit opozitar. Përsa i përket bashkëpunimit politik, në 27 vite tranzicion nuk jemi mësuar që t'i shikojmë partitë e opozitës që të jenë të hapura për të ofruar zgjidhje dhe alterna-
tiva", tha ajo. "Unë dua të them që historia e bashkëpunimeve ' underground' në LSI nuk do ekzistojë. E them këtë sepse bashkëpunimet do jenë transparente. Bashkëpunimet ' underground' janë bashkëpunime që prodhojnë kriza, destabilitet, varfëri dhe prodhojnë pushtet për oligarkët", tha Kryemadhi. Sa i përket ndonjë bashkëpunimi me PS- në në
zgjedhjet vendore, ajo tha se vendimi u përket strukturave dhe në këto zgjedhje janë individët që do të garojnë jo partitë. Ndërsa sa u përket kandidatëve të përbashkët me PD- në, Kryemadhi tha se mundet të kenë. E pyetur në lidhje me akuzat e bëra ndaj kreut të PD- së, Lulzim Basha për financimet ruse, Kryemadhi tha: "Mua më duken shumë qesharake. LSI do të shpallë fushatën e përzgjedhjes së kandidatëve të saj për zgjedhjet lokale, qoftë për kandidatët për anëtarë në këshillat bashkiakë, edhe për kandidatët për kryetarë bashkie aty ku LSI pretendon që të ketë fituesit e saj.
Problemi sot më i madh nuk është se a ka bërë fotografi me Presidentin Trump Lulzim Basha, apo ka paguar Partia Demokratike nga fondi apo buxheti i saj për lobing në Shtetet e Bashkuara të Amerikës. Besoj që e mbani mend që Edi Rama veshi fustan për të bërë një fotografi me Obamën para disa viteve dhe nuk ishte kjo gjëmë kaq e madhe".