Spiropali: Basha të mos i shmanget drejtësisë duke përdorur mandatin

Lulzim

Basha nuk mund t'i shmanget më drejtësisë, duke e përdorur mandatin e deputetit opozitar, siç përdori dikur një raport mjekësor, por të dalë të thotë të vërtetën", deklaroi dje, në një dalje për mediat Elisa Spiropali, Sekretare për rininë dhe koordinatore kombëtare për bashkëqeverisjen në PS. Sipas saj, "ka mbi një javë që çdo ditë, jo në mediat komuniste të Amerikës si "New York Times" por në median shqiptare, dalin fakte të reja. Por Lulzim Basha nuk arrin dot të japë as edhe një përgjigje të saktë për një krim financiar në aktivitetin elektoral e ndërkombëtar të Partisë Demokratike, që po bëhet gjithmonë e më i madh". "Basha deklaron se i ka dhënë kompanisë së lobimit vetëm 25 mijë dollarë, kurse kompania e lobimit deklaron se ka marrë 675 mijë dollarë për punën që ka bërë për Bashën. Këto deklarime, të cilat Basha i quan sajesa, nuk i ka bërë dikush që me Bashën nuk ka asnjë lidhje; nuk i kanë bërë as mediat komuniste amerikane dhe as mediat shqiptare; i ka bërë vetë i punësuari i Lulzim Bashës, Nick Muzin", tha Spiropali. Prandaj, shtoi Spiropali, s'ka asnjë dyshim se ai që gënjen nuk mund të jetë kurrkush tjetër veçse Lulzim Basha, të palarat e të cilit i ka nxjerrë në shesh kompania e lobimit me të cilën Lulzim Basha ka marrëdhënie kontraktuale të bëra jo në kafene, por me deklarata financiare tashmë të depozituara pranë Departamentit Amerikan të Drejtësisë dhe Njësisë së Regjistrimit të Agjentëve të Huaj në Shtetet e Bashkuara të Amerikës. "Për këtë arsye uluritëse, Lulzim Basha duhet të përgjigjet përpara ligjit, qoftë për gjysmë milionë dollarët ekstra që Partia Demokratike i ka paguar kompanisë së lobimit, qoftë për dhuratën ruse prej 150 mijë dollarësh që kompania e lobimit Muzin ka marrë nga firma Biniatta në këmbim të punës që Muzin ka kryer për Bashën",- tha ajo.