Arrestimi i kryebashkiakut të Lezhës, simpatizantët para komisariatit: Lirojeni
Nën akuzë për tjetërsimin e pronave në bregdetin e Shëngjinit, prapa hekurave 12 zyrtarë Dosja "Rana e Hedhun", Fran Frrokaj para gjykatës për masën e sigurisë
Qytetarë të shumtë janë mbledhur ditën e djeshme në dyert e policisë së Lezhës kundër arrestimit të kreut të bashkisë, Fran Frrokaj. Ky i fundit ra në prangat e policisë tri ditë më parë, së bashku me disa zyrtarë të tjerë, pasi akuzohet për tjetërsim pronash në bregdetin e Shëngjinit. Ndërkohë, simpatizantët e Frrokajt protestuan para komisariatit duke kërkuar lirimin e tij. Ata e quajtën të padrejtë dhe politik arrestimin e kryebashkiakut. Ndërkohë, Gjykata e Lezhës do të zhvillojë sot seancën për rivlerësimin e masës së arrestit për kryetarin e Bashkisë së Lezhës, Fran Frrokaj dhe 11 zyrtarëve të tjerë. Në seancë pritët që gjykata të vendosë nëse Frrokaj do të gjykohet në paraburgim apo i lirë. Kryebashkiaku, përfaqësues i PD- së, akuzohet për ' shpërdorim detyre', pasi ka dyshime se ka tjetërsuar prona tek ' Rana e Hedhun' në Shëngjin. Gjithashtu, pas hekurave përfunduan edhe nënkryetari i bashkisë, Enver Hafizaj, kreu i hipotekës, Gjelina Bacaj, bashkë me dy juristët Eduard Lekaj e Armando Dakaj.
PROTESTA
Familjarë dhe punonjës të administratës kanë qëndruar ditën e djeshme para komisariatit të Lezhës duke kundërshtuar arrestimin e kryebashkiakut, Fran Frrokaj. Ata kanë nisur të grumbullohen përpara hyrjes së komisariatit duke kërkuar lirimin e tij. Simpatizantët pretendojnë se Frrokaj nuk ka asnjë lidhje me tjetërsimin e pronave bregdetare. "Arrestimi është i pabazë. Është komplet një skenë e inskenuar politike. E konsideroj totalisht një arrestim politik. Bëj thirrje që drejtësia të mos jetë me dy standarde. Frrokaj është ndodhur në qytetin e tij, pranë banorëve të tij. Nuk e dimë për çfarë akuzohet kryetari, nuk ka prova", tha njëri prej mbështetësve të kryebashkiakut. Më herët, kryetari i Partisë Demokratike, Lulzim Basha në një takim me strukturat e selisë blu, ka deklaruar se shpreson që Frrokaj të jetë i pafajshëm dhe se PD kërkon hetim të paanshëm, jopoli- tik dhe profesional. "PD kërkon zbatimin e standardit se të gjithë duhet të jenë të barabarte para ligjit. Është e rëndësishme që të mos këtë drejtësi selektive, në funksion të një axhende politike të caktuar", është shprehur Basha.
ARRESTIMET
Drejtori i Policisë së Lezhës, Ferdinand Mara ka njoftuar tri ditë më parë se 12 zyrtarë kanë rënë në prangat e policisë, pasi akuzohen se kanë tjetërsuar pronat në bregdetin e Shëngjinit. Ndërkohë 11 të tjerë janë shpallur në kërkim. "Deri tani janë arrestuar dhe ndaluar 12 zyrtarë publikë dhe janë shpallur në kërkim 11 zyrtarë e shtetas të tjerë, të cilët në bashkëpunim me njëri- tjetrin, duke abuzuar me detyrën kanë falsifikuar, tjetërsuar dhe përvetësuar 234,548 m2 tokë shtetërore ranishte në zonën bregdetare Shëngjin, tek vendi i quajtur "Rana e Hedhun". Kjo sipërfaqe është shndërruar me dokumente të falsifikuara nga tokë shtetërore në bregdet, në tokë arë dhe pemëtore. Më pas është regjistruar në Zyrën e Regjistrimit të Pasurisë së Paluajtshme Lezhë ( ZRPP), duke përfituar padrejtësisht në interes të tyre dhe personave të tjerë. Këto hetime proaktive janë kryer në funksion të procedimit Penal regjistruar në vitin 2017, për veprat penale t? "Shpërdorimit të detyrës" dhe "Falsifikimi i dokumenteve", tha të premten drejtori i Policisë së Lezhës, Ferdinand Mara. Ndërkohë, prokuroria pritet të zgjerojë hetimet për përvetësimin e mbi 235 mijë metrave katrorë tokë në zonën e Quajtur Rana e Hedhun. Burime pranë organit të akuzës thanë se hetimet do të shtrihen dhe në zonat e tjera bregdetare të Shëngjinit, por edhe në Velipojë të Shkodrës, ku dyshohet se ka pasur abuzime me titujt e pronësisë.