Skënderbeu merr tri pikët, Sino "tërbon" Luftëtarin

Penallti inekzistente për të zotët e shtëpisë, një e paakorduar për miqtë Gjyqtari fierak e bën baltë me gabime

Skënderbeu fluturon me plot kuptimin e fjalës drejt titullit të shtatë në histori, ndërsa për të realizuar më mirë fitoren ndaj Luftëtarit është dashur dhe fluturimi i Ali Soues në zonë, i cili fiton një penallti inekzistente, që kontestohet fort nga miqtë, të cilët akuzojnë arbitrin Sino për gjykimin të njëanshëm. Ndonëse gjirokastritët vijnë me mungesa, ata arritën t'u hapin jo pak telashe vendësve, të cilët gjithsesi krijuan iluzionin se i mbyllën hesapet që në pjesën e parë. Në minutën e 23- të është Lilaj, i cili gjuan drejt portës, duke vënë në vështirësi Athanasopulos, i cili devijon duke shpëtuar katërkëndorin. Në minutën e 31- të Gavazaj merr topin dhe zhvendoset nga e djathta drejt qendrës, duke tentuar portën me një gjuajtje të fortë, portieri i Luftëtarit pret në pozicion. Dy minuta më pas vendësit kalojnë në epërsi. Xhejms. Nigeriani shpërthen në krahun e majtë dhe pasi hyn në zonë, mposht portierin kundërshtar me një goditje të zgjuar. Në minutën e 36të është Luftëtari që ngacmon, por Shehi kontrollon në dy kohë gjuajtjen me kokë të Aleksit. Abazaj shpërthen në të 41'- ën nga mesfusha dhe gjuan fort, por jashtë kuadratit. Momenti i parë i diskutueshëm në këtë ndeshje do të vijë në minutën e 44- ët. Soue lëshohet në zonë dhe e shtyn topin përpara ndërhyrjes së portierit Athanasopulos, që shmang kontaktin me sulmuesin, por për kryesorin Sino çuditërisht ka penallti. Nga pika e bardhë paraqitet Sabien Lilaj, që ekzekuton saktë, duke e çuar Skënderbeun në avantazh të dy golave në pushim. Por edhe pjesa e dytë do të nisë me pretendime për 11- metërsh, kësaj radhe janë gjirokastritët që e cilësojnë faull prekjen me dorë të topit në zonë nga ana e Micit, që i heq mundësinë e kontrollit kundërshtarit dhe protestojnë tek anësori Tararaj, që lë lojën të vazhdojë. Soue shfaqet rrezikshëm në minutën e 56- të, por gjuajtja e tij do të përfundojë jashtë kuadratit. Në minutën e 64- ët Shehi i dëmtuar i lë vendin Teqes, që bëhet menjëherë protagonist në minutën e 71- të, me daljen e pastudiuar që i lejon Liçajt të shkurtojë diferencën. Por në minutën e 85- të Teqja bën mrekullinë në skemën e bukur të jugorëve, që nxjerrin Lamçen para portës, por do të presë gardiani i korçarëve. Në minutën e 93- të Xhejms kërkon të mbyllë ndeshjen me një ekzekutim plot hijeshi, por topi do të dalë ngjitur me shtyllën. Mbyllet 2- 1 në Korçë, me Skënderbeun që ngjitet në kuotën e 60 pikëve, ndërsa Luftëtari mbetet i katërti me 37 pikë.