Shisnin kokainë në lokalin e natës, policia e FNSH arreston 2 pronarët dhe një vajzë
E reja kundërshtoi e fyeu blutë, i sekuestrohen 2 thika
FIER - Tre persona, mes të cilëve dhe një femër janë prangosur nga policia e Fierit, pasi janë kapur duke shpërndarë kokainë në një lokal nate, ku po organizohej një festë ' party'. Mësohet se në kuadër të operacionit të koduar "Mesnata", u arrestuan të rinjtë: Shkëlzen Gjata, 24 vjeç, banues në Drizë, Fier; Mariglen ( Renato) Mellaraj, 35 vjeç, banues në Fier ( pronarë të lokalit) si dhe 27- vjeçarja Pranvera Isufaj po nga Fieri. Burime zyrtare nga Drejtoria e Policisë së këtij qarku dje bënë me dije se arrestimi i tyre u bë i mundur mbi bazën e informacioneve të siguruara më parë në rrugë operative se në lokalin "New York" në lagjen "Apollonia", Fier gjatë një feste "party" që do të zhvillohej aty, do të shitej lëndë narkotike. Mbi bazën e këtij informacioni, është organizuar puna dhe në bashkëpunim me FNSH Fier, gjatë mesnatës, është shkuar në lokalin "New York" dhe është u ushtruar kontroll personave dhe ambienteve të këtij lokali, që ishte në administrim nga shtetasit Shkëlzen Gjata dhe Mariglen Mellaraj. Nga kontrolli i ushtruar në një dhomë me mbishkrimin "Private" u gjendën dhe u sekuestruan në cilësinë e provës materiale 36 copë paketime ( porcione) me lëndë narkotike e dyshuar kokainë, një peshore elektronike, një palë gërshërë, një fletore shënimesh etj. Gjatë kohës së kontrollit fizik të personave që ishin në këtë lokal dhe më konkretisht të shtetases Pranvera Isufaj, në çantën e saj të krahut i janë gjetur dhe sekuestruar në cilësinë e provës materiale 2 ( dy) thika me teh të përkulshëm të dyshuara si armë të ftohta. Mësohet se Pranvera Isufaj ka kundërshtuar hapur veprimet e policisë, duke përdorur dhe forcën me veprime aktive e për pasojë ka penguar në kryerjen e detyrës punonjësit e policisë si dhe i ka ofenduar ata. Materialet procedurale i kaluan prokurorisë së Fierit në ngarkim të shtetasve Shkëlzen Gjata dhe Mariglen Mellaraj për veprën penale "Prodhimi dhe shitja e lëndëve narkotike", "Përshtatja e lokalit për përdorim droge" dhe "Nxitja për përdorimin e drogës" dhe ndaj shtetases Pranvera Isufaj për veprat penale "Prodhimi, mbajtja, blerja apo shitja pa leje e armëve të ftohta" dhe "Kundërshtimi i punonjësit të policisë së rendit publik".