Kokaina në Maminas, Krimet e Rënda shpallin moskompetencë

Dosja i kalon prokurorisë së Durrësit

Dosja

hetimore për sasinë e 613 kilo gramëve kokainë të ardhur nga Kolumbia të bllokuar në Maminas, pritet t'i kalojë prokurorisë së Durrësit. Prokuroria e Krimeve të Rënda shpalli moskompetencën e hetimit pasi dosja është regjistruar si trafik narkotikësh, dhe jo grup i strukturuar kriminal. Kjo bazuar në një vendim unifikues të Gjykatës së Lartë. Përmes këtij vendimi Gjykata e Lartë la në kompetencën e Krimeve të Rënda vetëm dosjet për veprat penale që janë në kompetencën e hetimit dhe gjykimit nga Prokuroria dhe Gjykata Speciale SPAK. Procedimet e tjera penale, jashtë kësaj fushe, në çdo fazë të tyre, hetim apo gjykim, do t'i delegohen për kompetencë prokurorive dhe gjykatave të rretheve gjyqësore. Si rezultat i operacionit policor të koduar "Last Snow", u bë e mundur kapja dhe sekuestrimi i një sasie rekord prej 613 kg 350 gr lëndë narkotike e dyshuar kokainë, me vlerë tregu mbi 180 milionë euro. Mësohet se hetimet kanë dokumentuar se lënda narkotike ishte nisur me kontenier nga Kolumbia duke kaluar transit përmes Italisë, në Maltë e më pas me anije ka mbërritur në Portin e Durrësit në Shqipëri, më 19 shkurt të këtij viti. Sipas policisë, kokaina ishte e fshehur në kontenier me dysheme të dyfishtë, të ngarkuar me banane. Operacioni ka nisur gjatë mbrëmjes së datës 27 shkurt 2018, në portin e Durrësit, në momentin që ngarkesa e ligjshme me banane u mor në dorëzim nga firma porositëse "Arbri Garden" shpk, me pronar shtetasin Arbër Çekajn. Ky i fundit është shpallur në kërkim, ndërsa pas hekurave janë drejtuesi i kamionit dhe menaxheri i firmës, "Arbi Garden".